'ఆదిత్య 369'కి సీక్వెల్ గా ఆదిత్య 999 వ‌స్తుంద‌ని చాలా కాలంగా బాల‌య్య అభిమానులు ఆశ‌గా ఎదురు చూస్తున్నారు. ఇదిగో.. అదిగో అన్నారే కానీ.... ఒక్క అడుగు కూడా ముందుకు ప‌డలేదు. బాల‌య్య వందో సినిమాగా, మోక్ష‌జ్ఞ మొద‌టి సినిమాగా `ఆదిత్య 999`నే ఫ‌స్ట్ ఛాయిస్‌. అయితే.. బాల‌య్య వందో సినిమా మైలు రాయి.. `గౌత‌మి పుత్ర శాత‌క‌ర్ణి` అందుకొంది. అప్ప‌టి నుంచీ.. ఆదిత్య 999 క‌ల‌గానే మిగిలిపోయింది. ఇప్పుడా సినిమాని మ‌ర్చిపోతున్న త‌రుణంలో బాల‌య్య మ‌ళ్లీ ఆశ‌లు రేపాడు. 'ఆదిత్య 999' ప్ర‌స్తావ‌న తెచ్చాడు. అంతేకాదు.. ఈ సినిమాకి తానే ద‌ర్శ‌కుడ‌ని మ‌రో స్వీట్ న్యూస్ వినిపించాడు.

విశ్వ‌క్‌సేన్ సినిమా 'ద‌మ్కీ' ట్రైల‌ర్ లాంచ్‌కి బాలయ్య ముఖ్య అతిథిగా విచ్చేశాడు. ఈ సినిమాకి విశ్వ‌క్ సేన్ ద‌ర్శ‌కుడు. త‌నే హీరో. రెండు ప‌డ‌వ‌ల మీద ప్ర‌యాణం చేసిన విశ్వ‌క్‌ని చూసి బాల‌య్య స్ఫూర్తి పొందాడేమో...? ఆదిత్య 999 సినిమాని గుర్తు చేసుకొన్నాడు. న‌ర్త‌న‌శాల‌కు ద‌ర్శ‌క‌త్వం వ‌హిద్దామ‌నుకొని, ఆ సినిమాని ప‌క్క‌న పెట్టేయాల్సివ‌చ్చింద‌ని, అప్ప‌టి నుంచీ... ద‌ర్శ‌క‌త్వం వైపు ఆలోచించ‌లేద‌ని, వ‌చ్చే ఏడాది ఆదిత్య 999 తీస్తాన‌ని ఈ సంద‌ర్భంగా అభిమానుల‌కు మాట ఇచ్చేశాడు బాల‌య్య‌. ఆయ‌న అన్నాడంటే చేసి తీర‌తాడు.. సో 2024లో ఆదిత్య 999 చూసేయ‌డం దాదాపుగా ఖాయం అనుకోవాలి.

ఈ సినిమా స్క్రిప్టుపై సింగీతం శ్రీ‌నివాస‌రావు ఇది వ‌ర‌కే ప‌ని చేశారు. దాదాపు ఆయ‌న క‌థ సిద్ధం చేసేసిన‌ట్టే. ఆ క‌థే ఇప్పుడు ప‌ట్టాలెక్కిస్తారా, లేదంటే కొత్త క‌థ రాస్తారా? ఇందులో మోక్ష‌జ్ఞ కూడా ఉంటాడా? ఇలా మ‌ళ్లీ కొత్త ప్ర‌శ్న‌లు పుట్టుకొస్తున్నాయి. వాటికి స‌మాధానం బాల‌య్యే చెప్పాలి.