చాలా కాలం నుంచి వార్త‌ల్లో వినిపిస్తున్న సినిమా `బంగార్రాజు`. `సోగ్గాడే చిన్ని నాయిన`కి సీక్వెల్ చేయాల‌ని నాగార్జున ప్లాన్. అందుకోసం క‌ల్యాణ్ కృష్ణ స్క్రిప్టుని కూడా రెడీ చేశాడు. ఇదిగో... అదిగో అంటున్నారు త‌ప్ప, ఈ ప్రాజెక్టు పట్టాలెక్క‌డం లేదు. ప్ర‌స్తుతం నాగార్జున `వైల్డ్ డాగ్‌` అనే సినిమా చేస్తున్నాడు. ఇది పూర్త‌యిన వెంట‌నే `బంగార్రాజు` ప‌ట్టాలెక్కుతుంద‌నుకున్నారంతా. అయితే.. ఇప్పుడు ప్ర‌వీణ్ స‌త్తారు సినిమాకి ప‌చ్చ.జెండా ఊపి.. క‌ల్యాణ్ కి మ‌రోసారి షాకిచ్చాడు నాగార్జున. నిజానికి ఈ సినిమా చేయ‌డం నాగార్జున‌కు ఇష్టం లేద‌న్న‌ది ఇన్‌సైడ్ వ‌ర్గాల టాక్‌. ఇప్ప‌టికే స్క్రిప్టులో మారుసార్లు మార్పులు చేర్పులూ చేశాడు క‌ల్యాణ్. ఎన్నిసార్లు రిపేర్లు చేసినా, ఈ క‌థ ఓ ప‌ట్టాన నాగార్జున‌కి న‌చ్చ‌డం లేద‌ని తెలుస్తోంది.
నాగ్ అస‌లే వ‌రుస ఫ్లాపుల‌లో ఉన్నాడు. ఆఫీస‌ర్‌, మ‌న్మ‌థుడు 2 అట్ట‌ర్ ఫ్లాప్స్ అయ్యాయి. ఇలాంటి ప‌రిస్థితుల్లో ఇన్ని రిపేర్లు చేసి ఓ సినిమాని ప‌ట్టాలెక్కించ‌డం అవ‌స‌ర‌మా? అని నాగార్జున భావిస్తున్న‌ట్టు తెలుస్తోంది. అందుకే ఈ ప్రాజెక్టుని పూర్తిగా ప‌క్క‌న పెట్టేశాడ‌ని, ఈ విష‌యాన్ని క‌ల్యాణ్ కృష్ణ‌కి కూడా చూచాయిగా చెప్పేశాడ‌ని తెలుస్తోంది. సో.. ఇక బంగార్రాజుని చూడ‌డం క‌ష్ట‌మే.
