అనూహ్యంగా, భీమ్లా నాయ‌క్ రిలీజ్ డేట్ ముందుకొచ్చేసింది. చివ‌రి నిమిషాల్లో తీసుకున్న నిర్ణ‌యాల వ‌ల్ల‌.. భీమ్లా నాయ‌క్ ఈనెల 25నే వ‌చ్చేస్తున్నాడు. నిజానికి ఫిబ్ర‌వ‌రి 25, ఏప్రిల్ 1.. ఈ రెండు డేట్లూ ఫిక్స్ చేసుకున్నా - భీమ్లా 25న వ‌చ్చే అవ‌కాశాలు లేవ‌ని, ఏప్రిల్ 1నే ఈ సినిమా వ‌స్తుంద‌ని అంతా అనుకున్నారు. విడుద‌ల‌కు ఎంతో స‌మ‌యం లేక‌పోవ‌డం, ప్ర‌మోష‌న్లు ఇంకా మొద‌లెట్ట‌క‌పోవ‌డంతో.. భీమ్లా విడుద‌ల‌పై ఎవ‌రికీ ఆశ‌ల్లేవు. అయితే.. చివ‌రి నిమిషాల్లో తీసుకున్న నిర్ణ‌యం వ‌ల్లే ఫిబ్ర‌వ‌రి 25నే భీమ్లా రావ‌డం... అభిమానుల‌కు ఆనంద‌క‌ర‌మైన అంశ‌మే అయినా, రెండు సినిమాలు చాలా ఇబ్బంది ప‌డ‌బోతున్నాయి. అందులో ఒక‌టి.. ఆడవాళ్లూ మీకు జోహార్లు, రెండోది.. గ‌ని.

శ‌ర్వానంద్ న‌టించిన ఆడ‌వాళ్లూ మీకు జోహార్లూ ఈనెల 25న రాబోతోంది. భీమ్లా బ్లాక్ చేసిన‌.. డేట్ అది. ఆ రోజున భీమ్లా రాద‌న్న న‌మ్మ‌కంతో.. ఆడ‌వాళ్లు మీకు జోహార్లూ... 25న రావాల‌ని డిసైడ్ అయ్యింది. ప్ర‌మోష‌న్లూ మొద‌లెట్టింది. ఇప్పుడు స‌డ‌న్ గా భీమ్లా డేట్ ప‌డిపోయింది. ఇప్పుడు శ‌ర్వానంద్ సినిమా వెనుకడుగు వేయ‌లేని ప‌రిస్థితి. గ‌ని కూడా 25నే.. రావాల‌నుకుంది. చిత్ర‌బృందం రిలీజ్‌డేట్ కూడా ప్ర‌క‌టించింది. అయితే.. ఇప్పుడు విడుద‌ల వాయిదా ప‌డ‌బోతోంది. శ‌ర్వా మాత్రం ధైర్యం చేసి అడుగు ముందుకు వేయ‌బోతున్నాడు.