వ‌రుస ఫ్లాపుల‌తో స‌త‌మ‌త‌మ‌వుతున్న గోపీచంద్ 'భీమా' గా గ‌త‌వారం ప్రేక్ష‌కుల ముందుకు వ‌చ్చాడు. ఈ సినిమాకు డిజాస్ట‌ర్ టాక్ వ‌చ్చింది. రివ్యూలు ఈ సినిమాని ఏకిప‌డేశాయి. గోపీచంద్ కు మ‌రో ప‌రాభ‌వం త‌ప్ప‌లేద‌ని డిక్లేర్ చేసేశాయి. అయితే అదృష్ట‌వ‌శాత్తూ వ‌సూళ్లు అంత బ్యాడ్ గా ఏం లేవు. ఓ యావ‌రేజ్ సినిమాకొచ్చే వ‌సూళ్లు భీమాకు క‌నిపించాయి. శివ‌రాత్రి రోజున ఈ సినిమా విడుద‌ల కావ‌డం ప్ల‌స్ అయ్యింది. ఆ రోజు నైట్ షోలు హోస్ ఫుల్ అవ్వ‌డం, అదే మూడ్... వీకెండ్ కొన‌సాడంతో భీమా కాస్త తేరుకోగ‌లిగింది. అయిన‌ప్ప‌టికీ.. ఈ సినిమా బ్రేక్ ఈవెన్ అవ్వ‌లేదు. ప్ర‌తీ ఏరియాలోనూ క‌నీసం 30 శాతం న‌ష్ట‌పోయే ప్ర‌మాదం ఉంది.
మ‌రోవైపు 'గామి' ప‌రిస్థితి కొంచెం భిన్నంగా ఉంది. ఈ సినిమాకి మంచి రివ్యూలు వ‌చ్చాయి. వ‌సూళ్లూ బాగున్నాయి. త‌క్కువ బ‌డ్జెట్ తో ఈ సినిమాని రూపొందించ‌డం ప్ల‌స్ పాయింట్. దాంతో... త్వ‌ర‌గానే బ్రేక్ ఈవెన్‌కు చేరువైంది. ఓవ‌ర్సీస్‌లో భీమాతో పోలిస్తే గామి వ‌సూళ్లు మెరుగ్గా ఉన్నాయి. ఈవారం బాక్సాఫీసు ద‌గ్గ‌ర‌కు మ‌రో అర‌డ‌జ‌ను సినిమాలొస్తున్నాయి. అయితే అవ‌న్నీ చిన్న సినిమాలే. కాబ‌ట్టి గామి, భీమా పుంజుకోవ‌డానికి ఈ వారాంతం కూడా కాస్త ఛాన్సుంది. మొత్తానికి గోపీచంద్ కు హిట్టు ద‌క్క‌లేదు కానీ, వ‌సూళ్ల ప‌రంగా గ‌త చిత్రాల‌తో పోలిస్తే కాస్త ఊర‌ట ల‌భించింద‌నే చెప్పాలి.
