హీరోయిన్‌గా కెరీర్‌లో 'ఒక్కడు', 'ఖుషీ', సింహాద్రి' వంటి సూపర్‌ సక్సెస్‌లున్నా, అవకాశాల పరంగా ఎప్పుడూ తొందర పడలేదు భూమిక. గ్లామర్‌ పరంగా హద్దులు దాటలేదు. సినిమాలు సెలెక్టివ్‌గానే చేసింది. 'మిస్సమ్మ'లాంటి సినిమాతో నటిగా విమర్శకుల ప్రశంసలు అందుకుంది భూమిక గతంలో. 'మిస్సమ్మ' సినిమా ఆమె కెరీర్‌లో మరో మైలురాయిగా చెప్పుకోవాలి. 

కొంత గ్యాప్‌ తర్వాత తెలుగులో 'ఎంసీఏ' సినిమాలో నటించిందామె. ఈ సినిమా మంచి విజయాన్ని అందుకుంది. సినిమా ప్రమోషన్‌లో భాగంగా మీడియా ముందుకు వచ్చిన భూమిక, ఇకపైనా సెలెక్టివ్‌గానే సినిమాలు చేస్తానని చెప్పింది. సక్సెస్‌ ఎప్పుడూ బాధ్యతను పెంచుతుంది అనీ, అప్పుడు ఇంకా జాగ్రత్తగా తదుపరి సినిమాలను ఎంపిక చేసుకోవాల్సి ఉంటుందనీ, భూమిక వెల్లడించింది. నాని చాలా మంచి నటుడు. ఈ సినిమాలో నానితో కలిసి వర్క్‌ చేయడం చాలా ఆనందంగా ఉందనీ, అలాగే సాయిపల్లవి కూడా టాలెంటెండ్‌ యాక్ట్రస్‌.. ఇంతమంది టాలెంటెడ్‌ పీపుల్‌ కారణంగా సినిమాకి ఇంత మంచి గుర్తింపు వచ్చిందనీ భూమిక చెప్పింది. 

తెలుగుతో పాటు తమిళ, కన్నడ మలయాళ సినిమాల్లోనూ నటించింది భూమిక. బాలీవుడ్‌లో ఓ సినిమాలో నటిస్తోందిప్పుడు. విలక్షణ చిత్రాలను ఎంచుకుంటూ కొత్త ఇన్నింగ్స్‌లో కొత్త కొత్తగా సక్సెస్‌లు అందుకోవడానికి సిద్దమవుతున్న భూమికకు ఆల్‌ ది బెస్ట్‌ చెప్పేద్దాం. ఇదిలా ఉండగా, 'ఎంసీఏ - మిడిల్‌క్లాస్‌ అబ్బాయి' తొలి రోజు మిక్స్‌డ్‌ టాక్‌ వచ్చినా, వసూళ్ల పంట పండిస్తున్నాడు. నాని మ్యాజిక్‌ ఇంకోసారి వర్కవుట్‌ అయ్యిందని ట్రేడ్‌ పండితులు అంటున్నారు.