అఖండ‌తో ఓ సూప‌ర్ డూప‌ర్ హిట్ ని త‌న ఖాతాలో వేసుకున్నాడు బోయ‌పాటి శ్రీ‌ను. ఈ హిట్ తో మ‌ళ్లీ బోయ‌పాటి ఫామ్ లోకి వ‌చ్చిన‌ట్టే. `అఖండ‌` జోరు చూసి నిర్మాత‌లు బోయ‌పాటి వెంట ప‌డుతున్నారు. అఖండ 2 రాబోతోంద‌న్న ఓ టాక్ బ‌లంగా వినిపిస్తోంది. దానికి తోడుగా అల్లు అర్జున్ - బోయ‌పాటి కాంబినేష‌న్ లో ఓ సినిమా దాదాపుగా ఖాయ‌మైంది. అయితే ఈలోగా.. రామ్ తో ఓ సినిమా చేయ‌బోతున్నాడు బోయ‌పాటి. ఈ కాంబో గురించి న్యూస్ ఎప్పుడో బ‌య‌ట‌కు వ‌చ్చింది. కాక‌పోతే... బ‌న్నీ సినిమా పూర్త‌య్యాకే, రామ్ సినిమా ఉంటుంద‌ని భావించారు. కానీ ఇప్పుడు రామ్ సినిమానే ముందు పూర్త‌వుతుంద‌ని, ఆ త‌ర‌వాతే.. బ‌న్నీ సినిమా ఉంటుంద‌ని తెలుస్తోంది.

పుష్ప 1 త‌ర‌వాత‌.. బ‌న్నీ కాస్త గ్యాప్ తీసుకున్నాడు. అతి త్వ‌ర‌లోనే పుష్ప 2 సినిమా సెట్స్‌పైకి వెళ్తుంది. పుష్ప పూర్త‌వ్వ‌డానికి క‌నీసం 6 నుంచి 8 నెల‌ల స‌మ‌యం ప‌డుతుంది. ఈలోగా బోయ‌పాటి ఖాళీగా ఉండ‌డు క‌దా. అందుకే రామ్ తో సినిమా ప్లాన్ చేశాడ‌ని తెలుస్తోంది. రామ్ ప్ర‌స్తుతం లింగు స్వామి ద‌ర్శ‌క‌త్వంలో `ది వారియ‌ర్‌` చేస్తున్నాడు. అది పూర్త‌వ్వ‌గానే... బోయ‌పాటి సినిమా ప‌ట్టాలెక్కుతుంది. దీనికి మిర్యాల ర‌వీంద‌ర్ రెడ్డి నిర్మాత‌గా వ్య‌వ‌హ‌రించ‌బోతున్నారు.