టాలీవుడ్ లో మ‌రో సూప‌ర్ కాంబినేష‌న్ కుదిరింది. మెగాస్టార్ చిరంజీవి - మాట‌ల మాంత్రికుడు త్రివిక్రమ్ క‌ల‌సి ఓ సినిమా చేయ‌బోతున్నారు. ఈ విష‌యాన్ని చిరంజీవి స్వ‌యంగా వెల్లడించ‌డం విశేషం. 'విన‌య విధేయ రామ' ప్రీ రిలీజ్ ఫంక్ష‌న్‌కి చిరంజీవి, త్రివిక్రమ్ ఇద్ద‌రూ హాజ‌ర‌య్యారు. ఈసంద‌ర్భంగా వేదిక‌పై మాట్లాడుతున్న చిరు.. త్రివిక్ర‌మ్‌తో సినిమా చేస్తున్న‌ట్టు ధృవీక‌రించాడు. ఈ చిత్రానికి డివివి దాన‌య్య నిర్మాత‌గా వ్య‌వ‌హ‌రిస్తున్న‌ట్టు కూడా క్లారిటీ ఇచ్చేశాడు. ఈ కాంబినేష‌న్‌ని సెట్ చేసింది రామ్ చ‌ర‌ణ్ అని చెప్పుకొచ్చాడు చిరు.
చిరంజీవి న‌టించిన 'జై చిరంజీవ'కి త్రివిక్రమ్ సంభాష‌ణ‌లు అందించిన సంగ‌తి గుర్తుండే ఉంటుంది. అప్ప‌టికి త్రివిక్రమ్ ద‌ర్శ‌కుడిగా మారిపోయి.. బ‌య‌ట సినిమాలు మాటలు రాయ‌డం పూర్తిగా ఆపేశాడు. కానీ చిరంజీవిపై ఉన్న ఇష్టంతో ఆ సినిమాకి సంభాష‌ణ‌లు అందించాడు. కానీ.. ఆ సినిమా స‌క్సెస్‌కాలేదు. మొన్నామ‌ధ్య... చిరంజీవి, ప‌వ‌న్ లు క‌ల‌సి ఓసినిమాలో న‌టిస్తార‌ని, దానికి త్రివిక్రమ్ ద‌ర్శ‌క‌త్వం వ‌హిస్తార‌ని కూడా ప్ర‌చారం జ‌రిగింది. ఆసినిమా కూడా సెట్స్‌పైకి వెళ్ల‌లేదు. ఆ లోటుని ఈసారి.. తీర్చుకునే అవ‌కాశం త్రివిక్ర‌మ్‌కి ద‌క్కిన‌ట్టే.
