క్రిస్మ‌స్ సంబ‌రం వ‌స్తూ.. వ‌స్తూ చిరంజీవి ఇంట్లో స‌రికొత్త కేరింత‌ల్ని తీసుకొచ్చింది. పండ‌గ ఆనందాన్ని రెట్టింపు చేసింది. చిరంజీవిని మ‌రోసారి 'తాత‌య్య‌'గా మార్చేసింది. అవును.. చిరు మ‌రోసారి తాత‌య్య అయ్యారు. చిరు కుమార్తె శ్రీజ, కల్యాణ్‌దేవ్‌ దంపతులకు ఈరోజు  పండంటి ఆడ పిల్ల జ‌న్మించింది.  ఈ శుభ‌వార్త‌ని  కల్యాణ్‌దేవ్ ట్విట్ట‌ర్‌లో  అభిమానులతో పంచుకున్నారు.  పాప కాలి ముద్ర ఉన్న ఫొటోను కూడా  షేర్‌ చేశారు.

‘ఈ క్రిస్మస్‌ నా జీవితాంతం గుర్తుండి పోతుంది. ఈ రోజు ఉదయం ఆడ పిల్ల‌ పుట్టింది` అని త‌న ఆనందాన్ని పంచుకున్నారు.  కల్యాణ్‌దేవ్‌ ‘విజేత’ చిత్రంతో ప్రేక్ష‌కుల ముందుకు వ‌చ్చిన సంగ‌తి తెలిసిందే. ఆ సినిమా స‌రిగా ఆడ‌లేదు. కాక‌పోతే... క‌ల్యాణ్‌దేవ్‌కి న‌టుడిగా మంచి మార్కులు ప‌డ్డాయి. ఇప్పుడు  పులి వాసు దర్శకత్వం వ‌హిస్తున్న ఓ చిత్రంలో న‌టిస్తున్నారు. త్వ‌ర‌లోనే సెట్స్‌పైకి వెళ్ల‌నుంది.