'గీతాంజలి', 'జయమ్ము నిశ్చయమ్మురా' చిత్రాలతో హీరోగా మెప్పించాడు కమెడియన్‌ శ్రీనివాస్‌ రెడ్డి. అందులో 'గీతాంజలి' మంచి విజయాన్ని అందుకోగా, 'జయమ్ము నిశ్చయమ్మురా' ఫర్వాలేనిపించింది. హీరోగా అవకాశాలు వస్తున్నప్పటికీ, కమెడియన్‌గానూ అవకాశాలు వదులుకోవట్లేదు శ్రీనివాస్‌ రెడ్డి. ఆ విషయంలో శ్రీనివాస్‌ రెడ్డి అభినందించి తీరాలి. ఒక్కసారి హీరో అయ్యాక కమెడియన్‌గా మంచి అవకాశాలు వచ్చినప్పటికీ వదులుకునే వాళ్లున్నారు. అలాంటిది ఆ విషయంలో శ్రీవివాస్‌ రెడ్డిది సెపరేట్‌ రూటు. అది అదే, ఇది ఇదే అంటున్నాడు. తాజాగా శ్రీనివాస్‌ రెడ్డి 'రాజా ది గ్రేట్‌' సినిమాలో కనిపించాడు. రవితేజ హీరోగా తెరకెక్కిన ఈ సినిమాలో రవితేజ ఫ్రెండ్‌ క్యారెక్టర్‌లో కనిపించాడు శ్రీనివాస్‌ రెడ్డి. దాదాపుగా శ్రీనివాస్‌ రెడ్డి పాత్ర, హీరోతో సమానంగా ఉంటుంది ఈ సినిమాలో. శ్రీనివాస్‌ రెడ్డి కామెడీ సినిమాకి మెయిన్‌ అట్రాక్షన్‌ కూడా. తాజాగా శ్రీనివాస్‌ రెడ్డి హీరోగా ఓ సినిమా తెరకెక్కబోతోంది. యంగ్‌ హీరో సుమంత్‌ అశ్విన్‌తో 'రైట్‌ రైట్‌' సినిమాని తెరకెక్కించిన దర్శకుడు మను ఈ చిత్రానికి దర్శకత్వం వహిస్తున్నారు. ఓ ప్రముఖ హీరోయిన్‌ ఈ సినిమాలో హీరోయిన్‌గా నటించనుందట. 'గీతాంజలి'లో ముద్దుగుమ్మ అంజలి హీరోయిన్‌గా నటించగా, 'జయమ్ము నిశ్చయమ్మురా' కోసం పూర్ణ హీరోయిన్‌గా నటించింది. ఈ సినిమాలో నటించబోయే ఆ ప్రముఖ నాయకి ఎవరో త్వరలోనే తెలియనుందట. కాగా హీరోగా వచ్చిన ప్రతీ అవకాశాన్ని వినియోగించుకోకుండా, కథకి వేల్యూ ఇచ్చి, మంచి కథలని ఎంపిక చేసుకుంటూ, సెలెక్టెడ్‌గా సినిమాలు చేస్తున్నాడు శ్రీనివాస్‌ రెడ్డి.