`ప‌వ‌ర్ స్టార్‌` టాలీవుడ్ లో హాట్ టాపిక్‌గా మారిపోయింది. వ‌ర్మ ప‌వ‌న్ పై ఎక్కుపెట్టిన వ్యంగ్యాస్త్రం ఈ ప‌వ‌ర్ స్టార్‌. ప‌వ‌న్ పేరు పూర్తిగా బ‌య‌ట‌కు తీసుకురాక‌పోయినా `ప్ర‌వ‌ణ్ క‌ల్యాణ్‌` అంటూ ప‌రోక్షంగా ప‌వ‌న్‌ని చూపిస్తూ వ‌ర్మ `ప‌వ‌ర్ స్టార్‌` తీశాడు. మెగా కుటుంబం ఈ సినిమా విష‌యంలో ఏమాత్రం స్పందించ‌లేదు. అయితే ప‌వ‌న్ అభిమానులు మాత్రం ఊరుకోలేదు. ఏదో ఓ రూపంలో వ‌ర్మ‌ని టార్గెట్ చేస్తూనే ఉన్నారు. కొంత‌మంది సినిమాలూ, వెబ్ సిరీస్‌లూ మొద‌లెట్టారు. ఇప్పుడు ఏకంగా ప‌వ‌న్ క‌ల్యాణ్ రంగంలోకి దిగ‌బోతున్నాడు. ప‌వ‌న్ నుంచి ఓ స్పెష‌ల్ ఇంట‌ర్వ్యూ రాబోతోంద‌ని జ‌న‌సేన పార్టీ అధికారికంగా ప్ర‌క‌టించింది.

ఈ ఇంట‌ర్వ్యూల‌ను జ‌న‌సేన‌కు సంబంధించిన సోష‌ల్ మీడియాలో వ‌దులుతారు. ఈ టైమ్ లో ప‌వ‌న్ ఎందుకు ఇంట‌ర్వ్యూ ఇస్తున్న‌ట్టు? అనే ఆస‌క్తి అంద‌రిలోనూ నెల‌కొంది. స‌మాధానం సో.. సింపుల్‌. వ‌ర్మ‌ని ప‌వన్ ఇప్పుడు టార్గెట్ చేయ‌బోతున్నాడు. ప‌వ‌న్ పేరు వాడుతూ... వ‌ర్మ చాలాసార్లు కౌంట‌ర్లు వేశాడు. కానీ ఎప్పుడూ వాటిని ప‌వ‌న్ గుర్తించ‌లేదు. ప‌వ‌న్‌పై ఏకంగా సినిమా తీస్తూ, ప‌వ‌న్ వ్య‌క్తిగ‌త విష‌యాల్ని వాడుకోవాల‌ని చూసిన‌ప్పుడు సైతం ప‌వ‌న్ మాట్లాడ‌క‌పోతే ఎలా? అందుకే.. ప‌వ‌న్ ఇప్పుడు ఇంట‌ర్వ్యూకి రంగం సిద్ధం చేశాడు.

ఇంట‌ర్వ్యూ మొత్తం వ‌ర్మ గురించి కాక‌పోవొచ్చు. కానీ.. క‌నీసం ఓ ప్ర‌శ్న అయినా వ‌ర్మ‌పై ఉంటుంది. ఆ ప్ర‌శ్న‌తోనే వ‌ర్మ‌పై, వ‌ర్మ తీస్తున్న సినిమాపై ప‌వ‌న్ అభిప్రాయం మొత్తం చెప్పేయ‌నున్నాడు. వ‌ర్మ‌పై ప‌వ‌న్ సెటైర్లు కూడా వేయ‌బోతున్నాడ‌న్న గుస‌గుస‌లు వినిపిస్తున్నాయి. మ‌రి అవి ఏ ర‌కంగా పేల‌తాయో తెలియాలంటే ప‌వ‌న్ ఇంట‌ర్వ్యూ బ‌య‌ట‌కు రావాల్సిందే.