ప్రముఖ దర్శకుడు సుకుమార్‌ తన కొత్త సినిమా ఫస్ట్‌ లుక్‌ని తీసుకొస్తున్నాడు. అయితే ఇది ఆయన దర్శకత్వం వహిస్తున్న సినిమా కాదు. కానీ, అది ఆయన సినిమానే. మ్యాజిక్‌ ఏమీ లేదిక్కడ, చిన్న క్లారిటీ ఏంటంటే సుకుమార్‌ నిర్మాతగా రూపొందిస్తున్న సినిమా కహానీ ఇది. సుకుమార్‌ నిర్మాతగా మారి 'కుమారి 21 ఎఫ్‌' సినిమా నిర్మించిన సంగతి తెలుసు. రాజ్‌ తరుణ్‌, హెబ్బాపటేల్‌ జంటగా నటించిన ఆ సినిమా పెద్ద విజయాన్నే అందుకుంది. సుకుమార్‌ రైటింగ్స్‌ పేరుతో సినిమాల నిర్మాణం చేపడుతున్న సుకుమార్‌, తన తొలి ప్రయత్నంగా 'కుమారి 21ఎఫ్‌' సినిమా చేశాడు. రెండో సినిమా, తన అసిస్టెంట్‌ హరిప్రసాద్‌ దర్శకత్వంలో చేస్తున్నారు సుకుమార్‌. ఈ సినిమాతో అశోక్‌ అనే కొత్త హీరో పరిచయమవుతుండగా, ఇషా ఈ సినిమాలో హీరోయిన్‌గా నటిస్తోంది. సుకుమార్‌ సినిమాలు రొటీన్‌కి భిన్నంగా ఉంటాయి. టైటిల్‌ దగ్గర్నుంచే ఆ ప్రత్యేకత కన్పిస్తుంది. దాంతో ఫస్ట్‌ లుక్‌ ఎలా ఉండబోతోందనన్న ఉత్కంఠ సినీ వర్గాల్లోనూ, ప్రేక్షకుల్లోనూ నెలకొంది. ఇంకో వైపున సుకుమార్‌ దర్శకత్వంలో రామ్‌చరణ్‌ హీరోగా ఓ సినిమా సెట్స్‌ మీదకు వెళ్ళింది. ఈ సినిమాలో సమంత హీరోయిన్‌గా నటిస్తోంది. రామ్‌చరణ్‌ ఇప్పటిదాకా చేయని ఓ విభిన్నమైన పాత్ర ఈ సినిమాలో చేస్తున్నాడు. పల్లెటూరి యువకుడి పాత్రలో రామ్‌చరణ్‌ లుక్‌ ఇప్పటికే అనధికారికంగా రివీల్‌ అయ్యింది. ఆ లుక్‌కి మంచి స్పందన వస్తోంది.