టాలీవుడ్‌లో వున్న అతికొద్ది మంది క్రియేటివ్‌ దర్శకుల్లో కృష్ణవంశీ ఒకరు. ఆయన సినిమాలు రొటీన్‌కి భిన్నంగా ఉంటాయి. కృష్ణవంశీ సినిమాలంటే సాంకేతికతకి పెద్ద పీట ఉంటుంది. అలాగే సినిమాలో బలమైన భావోద్వేగాల్ని చూస్తాం. ఏ సినిమా చేసినా అందులో తనదైన ప్రత్యేకతను చూపించడం కృష్ణవంశీ స్పెషాలిటీ. రిస్క్‌ లేకుండా కృష్ణవంశీ సినిమా ఉండదు. అలాంటి కృష్ణవంశీ నుంచి వస్తోన్న సినిమా 'నక్షత్రం'. టైటిల్‌లోనే బ్రైట్‌నెస్‌ ఉంది. కాస్టింగ్‌ కూడా చాలా ఎక్కువే. గత సంవత్సర కాలంగా ఈ సినిమా కోసం ఎంతో డెడికేటెడ్‌గా వర్క్‌ చేస్తున్నాడు కృష్ణవంశీ. ఏదో కొత్తదనం చూపిస్తానంటున్నాడు ఈ సినిమా ద్వారా. సినిమా టీజర్‌ తాజాగా విడుదలైంది. సింప్లీ సూపర్బ్‌ అనే స్థాయిలో టీజర్‌ ఉంది. ఇందులో హీరోయిన్‌ రెజినా గ్లామర్‌, మరో హీరోయిన్‌ ప్రగ్యా జైస్వాల్‌ యాక్షన్‌ హైలైట్స్‌గా చెప్పవచ్చు. ఈ ఇద్దరు ముద్దుగుమ్మలు ఇంతవరకూ చేయని పాత్రల్లో చాలా కొత్తగా కనిపిస్తున్నారు. యంగ్‌ హీరో తనీష్‌ ఈ సినిమాలో నెగెటివ్‌ రోల్‌ చేస్తున్నాడు. అలాగే జెడి చక్రవర్తి మరో ముఖ్యమైన పాత్రలో నటిస్తున్నాడు. సందీప్‌ కిషన్‌, రెజినా జంటగా నటిస్తున్న ఈ సినిమాలో సాయిధరమ్‌ తేజ అతిథి పాత్రలో కనిపిస్తాడు. అతని పాత్రనీ చాలా కొత్తగా డిజైన్‌ చేశాడట దర్శకుడు. ఎప్పుడూ నవ్వుతూ కనిపించే సాయిధరమ్‌ తేజ్‌ ఓ పవర్‌ఫుల్‌ పోలీసాఫీసర్‌ పాత్రలో కనిపిస్తున్నాడు ఈ సినిమాలో. త్వరలోనే ప్రేక్షకుల ముందుకు రానుంది ఈ సినిమా.
