'బాహుబలి ది కన్‌క్లూజన్‌' సినిమా తర్వాత ప్రబాస్‌ చేయబోతున్న సినిమా 'సాహో'. ప్రబాస్‌ యూనివర్సల్‌ స్టార్‌డమ్‌ని దృష్టిలో పెట్టుకుని ఈ సినిమాని తెలుగుతో పాటు తమిళం, హిందీలో కూడా విడుదల చేస్తున్నారు. అందుకే ఈ మూడు భాషల్లోనూ పరిచయం ఉన్న హీరోయిన్‌ని ఈ సినిమాకి హీరోయిన్‌గా ఎంచుకుందామని అనుకుంటున్నారు. ఈ విషయమై ఇప్పటికే హీరోయిన్‌ వేట శరవేగంగా సాగుతోంది. అయితే ఇప్పటికే పలువురు పాపులర్‌ హీరోయిన్ల పేర్లు లిస్టులో ఉన్నాయి. అయితే వారిలో ఇంకా ఎవ్వరూ ఫైనల్‌ కాలేదు. తక్కువ బడ్జెట్‌తో సాదా సీదా స్వీట్‌ అండ్‌ లవ్‌లీ ఎంటర్‌టైనర్‌గా తెరకెక్కించాలనుకున్న ఈ సినిమా, 'బాహుబలి' పాపులారిటీతో అత్యంత ప్రతిష్ఠాత్మక చిత్రంగా మారిపోయింది. భారీ బడ్జెట్‌తో ఈ సినిమాని తెరకెక్కిస్తున్నారు. యు.వీ క్రియేషన్స్‌ సంస్థ ఈ సినిమాని నిర్మిస్తోంది. హాలీవుడ్‌ సినిమా రేంజ్‌లో ఈ సినిమా టెక్నికల్‌ వేల్యూస్‌ ఉండబోతున్నాయంటున్నారు. సినిమా స్క్రీన్‌పై రిచ్‌గా కనిపించేందుకు తగిన జాగ్రత్తలన్నీ తీసుకుంటున్నారట. ఇప్పటికే టీజర్‌ కటింగ్‌ చూస్తుంటే..అంచనాల్ని మించి పోయేలా ఉంది. యంగ్‌ డైరెక్టర్‌ సుజిత్‌ ఈ సినిమాని తెరకెక్కిస్తున్నారు. అయితే ఈ సినిమాలో ప్రబాస్‌తో జోడీ కట్టే ఆ ముద్దుగుమ్మ ఎవరనేదే ప్రస్తుతం సస్పెన్స్‌గా మారింది. ఈ బాహుబలితో ఆన్‌ స్క్రీన్‌ రొమాన్స్‌ చేసే ఆ ముద్దుగుమ్మ ఎవరో, ఎక్కడుందో కానీ ఈ లోగా పలు రూమర్లు చక్కర్లు కొట్టేస్తున్నాయి.