'బాబు బాగా బిజీ' సినిమా గురించి అనేక గాసిప్స్‌ ఆందోళన కలిగిస్తున్నాయి. బాలీవుడ్‌ సినిమా 'హంటర్‌'కి ఇది తెలుగు రీమేక్‌గా తెరకెక్కుతోంది. అవసరాల శ్రీనివాస్‌ ఇందులో ప్రధాన పాత్ర పోషిస్తున్నాడు. మిస్తీ చక్రవర్తి, శ్రీముఖి, తేజస్వి మాదివాడ ఇందులో హీరోయిన్లుగా నటిస్తున్నారు. అడల్ట్‌ కంటెంట్‌తో కూడిన సినిమా ఇది. 'హంటర్‌' సినిమా బాలీవుడ్‌లోనే హాట్‌ ప్రకంపనలకు కారణమైంది. రాధికా ఆప్టే అందులో బోల్డ్‌ అవతార్‌లో కనిపించింది. తెలుగు వెర్షన్‌లోనూ ఆ హాట్‌ అప్పీల్‌ తగ్గలేదట. ట్రైలర్‌, టీజర్‌ ఇప్పటికే హీటెక్కించేస్తున్నాయి. సెన్సార్‌ ఈ సినిమాకి ఎక్కువ కటింగులు వేసే అవకాశం ఉందంటున్నారు సినీ పండితులు. అవసరాల అంటే మంచి టైమింగ్‌ ఉన్న కామెడీకి పెట్టింది పేరు. అలాగే కూల్‌ గుడ్‌ రొమాంటిక్‌ మూవీస్‌ని తెరకెక్కించిన డైరెక్టర్‌గా మంచి పేరు తెచ్చుకున్నాడు. అలాంటిది ఎందుకు ఇలాంటి సబ్జెక్ట్‌ని ఎంచుకున్నాడో అంటూ టాలీవుడ్‌ వర్గాలు భావిస్తున్నాయి. అవసరాల ఎందుకింత రిస్క్‌ చేశాడో తెలీడం లేదు. మొన్నీ మధ్యనే సమంత్‌ హీరోగా 'నరుడా డోనరుడా' సినిమా తెరకెక్కింది. అది కూడా డిఫరెంట్‌ కాన్సెప్ట్‌ సినిమానే. అడల్ట్‌ సబ్జెక్ట్‌ మూవీ కావడంతో బాలీవుడ్‌లో సక్సెస్‌ అయినా కానీ టాలీవుడ్‌లో నిలదొక్కుకోలేకపోయింది. మరి ఈ సినిమాతో అవసరాల ఎంత మేర సక్సెస్‌ అవుతాడో చూడాలిక.