యువ హృదయాల్ని కొల్లగొట్టేయడంలో తెలుగమ్మాయ్‌ ఈషా రెండాకులు ఎక్కువే చదివినట్లుంది. 'అంతకు ముందు ఆ తరువాత' సినిమాతోనే మంచి సక్సెస్‌ అందుకున్న ఈ బ్యూటీ, మధ్యలో కొంత స్లో అయ్యింది అవకాశాల పరంగా. మళ్లీ 'అమీ తుమీ'తో ఇంకో సక్సెస్‌ అందుకుంది. ఈసారి మాత్రం ఈ బ్యూటీని అవకాశాలు వెతుక్కుంటూ వచ్చేశాయి. లేటెస్ట్‌గా 'దర్శకుడు' సినిమాతో ఈషా ప్రేక్షకుల ముందుకొచ్చింది. సినిమా సినిమాకీ తెలుగు ప్రేక్షకుల్ని మరింతగా ఆకట్టుకుంటోన్న ఈషా, 'దర్శకుడు' సినిమాతోనూ ఆకట్టుకుందని రిపోర్ట్స్‌ వస్తున్నాయి. సినిమాలో ఈషా నటనకి మంచి రెస్పాన్స్‌ వస్తోంది. నటన పరంగా చాలా మంచి మార్కులు కొట్టేసిందంటున్నారు. అందానికి అందం, నటనకి నటన అన్నీ ఉన్న ఈ తెలుగమ్మాయ్‌ ముందు ముందు పెద్ద సినిమాల్లో నటించి పెద్ద హీరోయిన్‌ అయిపోయినా ఆశ్చర్యపోవాల్సిన పని ఉండదు. తెలుగమ్మాయిలకి తెలుగు సినిమాల్లో అవకాశాలు తక్కువనే అపప్రధ ఉంది. ఆ అపప్రధ తొలగాలంటే ఈషా లాంటి తెలుగమ్మాయిల్ని ప్రోత్సహించాల్సిన అవసరం తెలుగు సినీ పరిశ్రమకు ఎంతైనా ఉందని నిస్సందేహంగా చెప్పవచ్చు. చిత్రంగా తెలుగమ్మాయిలు తెలుగు తెరపై కన్నా తమిళ తెరపై ఎక్కువ రాణిస్తుంటారు. ఈషా కూడా ఓ తమిళ సినిమాలో నటించింది ఇప్పటికే.