రాజ‌మౌళి మల్టీస్టార‌ర్‌  #RRR  షూటింగ్ శ‌ర‌వేగంగా సాగుతోంది. ఎన్టీఆర్ - రామ్‌చ‌ర‌ణ్ మిన‌హాయిస్తే... ఈ సినిమాలో క‌నిపించే మిగిలిన తారాగ‌ణం ఎవ‌ర‌న్న విష‌యంలో ఇంకా క్లారిటీ రాలేదు. ఈ సినిమాలో ముగ్గురు క‌థానాయిక‌లుంటార‌న్న ప్ర‌చారం జోరుగా సాగుతోంది. వాళ్ల పేర్లు కూడా చిత్ర‌బృందం ప్ర‌క‌టించ‌లేదు. అయితే కొన్ని పేర్లు మాత్రం బ‌య‌ట‌కు వ‌స్తున్నాయి. ప్రియ‌మ‌ణి ఈ సినిమాలో ఓ కీల‌క పాత్ర పోషించ‌బోతోంద‌ని ప్ర‌చారం సాగుతోంది.

ఇప్పుడు ఈషారెబ్బా పేరు కూడా వినిపిస్తోంది. #RRR లో ఈషారెబ్బాకి ఓ పాత్ర ద‌క్కింద‌ని స‌మాచారం. `అర‌వింద స‌మేత వీర రాఘ‌వ‌`లోనూ ఈషా మెరిసింది. అలానే ప్రాధాన్యం ఉన్న మ‌రో పాత్ర‌లో ఈషా న‌టించ‌నున్న‌దని టాలీవుడ్ వ‌ర్గాలు చెబుతున్నాయి. వీటిపై ఈషా కూడా స్పందించింది ''ఆర్‌.ఆర్‌.ఆర్‌లో అవ‌కాశం రావ‌డం కంటే.. గొప్ప అదృష్టం ఉంటుందా?  ఈ వార్త నేనూ విన్నాను. కానీ నా వ‌ర‌కూ రాలేదు. వ‌స్తే త‌ప్ప‌కుండా చెబుతా'' అని క్లారిటీ ఇచ్చింది.

మ‌రోవైపు 'ఎన్టీఆర్' బ‌యోపిక్‌లోనూ ఈ తెలుగ‌మ్మాయికి చోటు ద‌క్కిందిని టాక్‌. ఈ విష‌యంలో మాత్రం క్లారిటీగా స‌మాధానం చెప్ప‌లేదు. ''ఆ విష‌యం నేనే చెబితే బాగోదు. చిత్ర‌బృంద‌మే ప్ర‌క‌టించాలి'' అంటోంది. ఈషా మాట‌ల్ని బ‌ట్టి చూస్తే.. ఎన్టీఆర్ బ‌యోపిక్‌లో ఈషాకి ఛాన్స్ ద‌క్కిన‌ట్టే అనిపిస్తోంది. మ‌రి తాను ఎవ‌రి పాత్ర‌లో క‌నిపిస్తుందో చూడాలి.