ఎఫ్ 2 ఎంత‌గా న‌వ్వించిందో ప్ర‌త్యేకంగా చెప్పాల్సిన ప‌నిలేదు. థియేట‌ర్ మొత్తాన్ని షేక్ చేసేసింది. బాక్సాఫీసు ద‌గ్గ‌ర వ‌సూళ్ల వ‌ర్షం కురిపించుకుంది. అందుకే ఇప్పుడు ఎఫ్ 3 రాబోతోంది. ఈ సినిమాలోనూ వెంకీ, వ‌రుణ్‌, త‌మ‌న్నా, మెహ‌రీన్ లే క‌నిపించ‌నున్నారు. ఎఫ్ 2లో ఉన్న వాళ్లంతా ఈ సినిమాలో రిపీట్ అవ్వ‌బోతున్నారు. వాళ్లంద‌రికీ సునీల్ ఎక్స్‌ట్రా.

అయితే ఈ సినిమాకీ ఎఫ్ 2 కీ సంబంధం లేద‌ని, ఇది సీక్వెల్ కాద‌ని, కొత్త క‌థ‌తో రూపొందిస్తున్నామ‌ని ద‌ర్శ‌కుడు అనిల్ రావిపూడి అంటున్నాడు. పాత్ర‌లు అవే, టైటిల్ అదే. కానీ క‌థే వేర‌న్న‌మాట‌. అయితే ఈసారి వినోదం పంచ‌డానికి ద‌ర్శ‌కుడు కొత్త రూటు ఎంచుకున్నాడ‌ని భోగ‌ట్టా. ఈ సినిమాలో వెంక‌టేష్ కి రేచీక‌టి అని, వ‌రుణ్ కి న‌త్తి అని.. ఆ లోపాల‌తోనే బోల్డ‌న్ని న‌వ్వులు పండిస్తార‌ని, వెంకీ, వ‌రుణ్‌ల క్యారెక్ట‌రైజేష‌న్లు చాలా స్పెష‌ల్ గా, విచిత్రంగా తీర్చిదిద్దార‌ని, వాటితోనే ఫ‌న్ పుట్టుకొస్తుంద‌ని తెలుస్తోంది. రేచీక‌టి, న‌త్తిల‌తో వెండి తెర‌పై హాస్య‌న‌టులు కావ‌ల్సినంత వినోదం పండించారు. హీరోల‌కి ఈ లోపాల్ని పెట్ట‌డం కొత్త‌. మ‌రి ఈసారి ఎంత ఫ‌న్ పండుతుందో. ఈ సంక్రాంతికి ఎఫ్ 3 విడుద‌ల చేయ‌బోతున్నారు.