'బాహుబలి' సినిమాతో యూనివర్సల్‌ స్టార్‌ అనిపించుకున్నాడు. ఆ సినిమా తెచ్చిన స్టార్‌డమ్‌తో తదుపరి సినిమా 'సాహో' భారీ అంచనాలతో తెరకెక్కింది. కానీ, బాక్సాఫీస్‌ వద్ద బొక్క బోర్లా పడింది. తర్వాత ప్రబాస్‌ తన కెరీర్‌ని ఎలా టర్న్‌ చేసుకోవాలో తెలియని అగమ్యగోచార స్థితిలో పడిపోయాడు. ప్రస్తుతం ప్రబాస్‌ చేతిలో 'జాన్‌' మూవీ ఉంది.
నిజానికి ఈ సినిమా 'సాహో' షూటింగ్‌ జరుగుతున్న టైమ్‌లోనే సెట్స్‌ మీదికి వెళ్లింది. హీరోయిన్‌, ఇతర నటీనటులతో రెండు షెడ్యూల్స్‌ షూటింగ్‌ కూడా పూర్తి చేసుకుంది. ఆ లెక్కల్లో ఇప్పటికి ఈ సినిమా ఓ కొలిక్కి వచ్చేయాల్సిందే. కానీ, సినిమా స్టేటస్‌ ఏంటనేది బయటకి రాకుండా జాగ్రత్త పడుతున్నారు. నిజంగానే స్టేటస్‌ తెలియకుండా జాగ్రత్త పడుతున్నారనుకోవాలా.? లేక, షూటింగ్‌ ఏమైనా అటూ ఇటూ అయ్యిందా.? అనే అనుమానాలు వస్తున్నాయిప్పుడు. 'జాన్‌'కి సంబంధించి ఎలాంటి అప్‌డేట్‌ లేదు.
ఆ మాటకొస్తే, టైటిల్‌ కూడా వర్కింగ్‌లోనే ఉంది. అధికారికంగా ప్రకటించలేదు. సో 'సాహో' ఇచ్చిన షాక్‌ నుండి ప్రబాస్‌ ఇంకా తేరుకున్నట్లు కనిపించడం లేదు. అసలింతకీ 'జాన్‌' షూటింగ్‌ జరుగుతోందా.? ఒకవేళ జరుగుతుంటే, ఎంత వరకూ వచ్చింది.? సంక్రాంతికి 'జాన్‌' నుండి ఏదైనా అప్‌డేట్‌ వస్తుందా.? అని ప్రబాస్‌ ఫ్యాన్స్‌ సోషల్‌ మీడియా వేదికగా ప్రశ్నల వర్షం కురిపిస్తున్నారు. మరోవైపు అర్జున్‌ రెడ్డి డైరెక్టర్‌ సందీప్‌ రెడ్డి వంగాతో ప్రబాస్‌ సినిమా.. అంటూ కొత్త ప్రచారం తెరపైకి వచ్చింది. ఈ ప్రచారం పైనా, 'జాన్‌' విషయంలో ఫ్యాన్స్‌లో నెలకొన్న అనుమానాల పైనా ప్రబాస్‌ ఎలా స్పందిస్తాడో చూడాలిక.
