ఈ సమ్మర్‌ సీజన్‌లో ఆడియన్స్‌ని అలరించేందుకు పలు తెలుగు సినిమాలు క్యూ కట్టేస్తున్నాయ్‌. 'బాహుబలి ది బిగినింగ్‌' నేడే విడుదల కాగా, వరుసగా విడుదల కానున్న సినిమాల డేట్స్‌ క్లియర్‌ అవుతున్నాయి. మే 19న గోపీచంద్‌ నటించిన 'ఆరడుగుల బుల్లెట్‌' సినిమాని విడుదల చేస్తున్నారు. బి.గోపాల్‌ ఈ చిత్రానికి దర్శకత్వం వహించగా, గోపీచంద్‌ సరసన ఈ సినిమాలో నయనతార హీరోయిన్‌గా నటించింది. బి.గోపాల్‌ అంటే మాస్‌ చిత్రాలకు కేరాఫ్‌ అడ్రస్‌. గోపీచంద్‌ కూడా మాస్‌ హీరోగా ఇప్పటికే మంచి ఇమేజ్‌ సాధించుకున్నాడు. ఈ సినిమా కాకుండా గోపీచంద్‌ నటించిన 'ఆక్సిజన్‌', 'గౌతమ్‌నందా' సినిమాలు కూడా విడుదలకు సిద్ధమవుతున్నాయి. ఇంకో వైపున యంగ్‌ హీరో నటించిన 'అంధగాడు' విడుదలకు ముస్తాబైపోయింది. అలాగే దాదాపు డజను వరకు సినిమాలు ఈ వేసవిలో ప్రేక్షకుల ముందుకు రావడానికి సిద్ధంగా ఉన్నాయి. తెలుగు సినీ పరిశ్రమకు సంబంధించినంతవరకు సమ్మర్‌ సీజన్‌ వెరీ వెరీ స్పెషల్‌. చాలా వరకు పెద్ద సినిమాలు సమ్మర్‌లో పోటీ పడటానికి ఉత్సాహం చూపుతాయి. అయితే ఈ సమ్మర్‌లో మరీ అంత ఎక్కువగా పెద్ద సినిమాలు రాకపోవడం అభిమానులను నిరాశపరుచుతుంది. అయితే అన్ని సినిమాల సందడీ కలిసి ఒక్క 'బాహుబలి' సందడితోనే బ్యాలెన్స్‌ అయిపోతుందనడం నిస్సందేహమే.