చిత్ర‌సీమ‌లో ఇప్పుడు హీరోల‌కు క‌రువొచ్చిన‌ట్టుంది. హీరోలంతా.. ఎవ‌రి సినిమాల్లో వాళ్లు బిజీగా ఉన్నారు. దాంతో హిట్టు కొట్టిన ద‌ర్శ‌కులు కూడా స‌రైన హీరోల్లేక ఖాళీగా ఉండాల్సిన ప‌రిస్థితి వ‌చ్చింది. ఆర్‌.ఎక్స్ 100 త‌ర‌వాత అజ‌య్ భూప‌తి, ప్ర‌తీరోజూ పండ‌గే త‌ర‌వాత మారుతి ఎంత కాలం వెయిట్ చేశారో ప్ర‌త్యేకంగా గుర్తు చేయాల్సిన అవ‌స‌రం లేదు. ఇప్పుడు గోపీచంద్ మ‌లినేనికీ అదే స‌మ‌స్య ఉత్ప‌న్నం అయ్యేలా వుంది. క్రాక్ తో ఓ సూప‌ర్ హిట్టు కొట్టాడు గోపీచంద్ మ‌లినేని.

సంక్రాంతి సినిమాగా నిలిచి - మంచి వ‌సూళ్ల‌ని రాబ‌ట్టుకుంది. ఇప్ప‌టికీ.. బీ, సీ సెంటర్ల‌లో దుమ్ము దులుపుతోంది. ఈ హిట్టు త‌ర‌వాత‌.. నంద‌మూరి బాల‌కృష్ణ‌తో గోపీచంద్ తో ఓ సినిమా చేస్తాడ‌ని ప్ర‌చారం మొద‌లైంది. బాల‌య్య - గోపీచంద్ కాంబో బాగానే ఉంటుంది మ‌రి. కాక‌పోతే... బాల‌య్య ఇప్పుడు ఖాళీగా లేడు. బోయ‌పాటి శ్రీ‌నుతో ఓ సినిమా చేస్తున్నాడు. అదెప్పుడు పూర్త‌వుతుందో తెలీదు. బోయ‌పాటి కంటే ముందు బాల‌య్య కొన్ని క‌మిట్మెంట్స్ కి ఓకే చెప్పాడు. అవి కూడా పూర్తవ్వాలి. దాదాపుగా మ‌రో ఆరు నెల‌లైనా ఆగాల్సిన ప‌రిస్థితి క‌నిపిస్తోంది. అప్ప‌టి వ‌ర‌కూ గోపీచంద్ ఆగాలి. లేదంటే మ‌రో హీరోని చూసుకోవాలి. ప్ర‌స్తుతానికైతే... హీరోలెవ‌రూ ఖాళీగా లేరు. కాబ‌ట్టి.. గోపీచంద్ కి గ్యాప్ త‌ప్ప‌దు.