కళ్యాణ్‌రామ్‌ నిర్మాతగా తెరకెక్కుతోన్న చిత్రం 'జై లవ కుశ'. ఈ చిత్రాన్ని బాబీ డైరెక్ట్‌ చేస్తున్నారు. ఎన్టీయార్‌ త్రిపాత్రాభినయంలో తెరకెక్కుతోంది ఈ చిత్రం. చిరంజీవి తర్వాత ఈ జనరేషన్‌లో త్రిపాత్రాభినయం చేస్తోంది ఎన్టీఆరే. 'జెంటిల్‌మెన్‌' ఫేం నివేదా థామస్‌, రాశి ఖన్నా హీరోయిన్లుగా నటిస్తున్నారు. ఈ సినిమా టైటిల్‌తో కూడిన ప్రీ లుక్‌ ఇప్పటికే సంచలనాలను సృష్టించింది. మే 20 ఎన్టీయార్‌ పుట్టినరోజు. ఈ సందర్భంగా అభిమానులకు ఒకరోజు ముందే కానుక ఇవ్వాలని 'జై లవ కుశ' టీమ్‌ భావించింది. అందులో భాగంగా ఈ సినిమా ఫస్ట్‌లుక్‌ రానుందని ప్రకటించింది. అలాగే ఈ సినిమాలో ఎన్టీఆర్‌ చాలా ప్రత్యేకంగా కనిపించబోతున్నారట. మూడు గెటప్స్‌లో కనిపించనున్న ఎన్టీఆర్‌ పాత్రలకు మేకప్‌ కోసం హాలీవుడ్‌ నుండి మేకప్‌ నిపుణులను తీసుకొచ్చారట. ఎన్టీఆర్‌ - కళ్యాణ్‌రామ్‌ కాంబినేషన్‌లో తెరకెక్కుతోన్న తొలి చిత్రం ఇది. నిర్మాతగా కళ్యాణ్‌ రామ్‌ బడ్జెట్ విషయంలో అస్సలు రాజీపడకుండా ఈ సినిమాని తెరకెక్కిస్తున్నారట. భారీ బడ్జెట్ మూవీగానే ఈ సినిమా రూపొందనుంది. 'జనతా గ్యారేజ్‌' సినిమాతో ఎన్టీఆర్‌ బాక్సాఫీస్‌ రికార్డులు సృష్టించాడు. ఆ సక్సెస్‌ని దృష్టిలో పెట్టుకుని ఈ సినిమాపై భారీగా అంచనాలున్నాయి. అన్నట్లు ఈ సినిమాలో ఎన్టీఆర్‌ ఓ పాత్రలో నెగిటివ్‌ రోల్‌లో కనిపించనున్నాడనీ ప్రచారం జరుగుతోంది. అయితే ఈ విషయంపై క్లారిటీ రాలేదు. కానీ, ఏది ఏమైనా ఎన్టీఆర్‌కి ఈ సినిమా వెరీ వెరీ స్పెషల్‌ కానుందని మాత్రం ఖచ్చితంగా చెప్పొచ్చు.
