ఓ పక్క సంక్రాంతి సీజన్‌ సందర్భంగా ధియేటర్లో 'అజ్ఞాతవాసి'తో మొదలైన సినిమాల హంగామా ఈ రోజు 'జై సింహా' విడుదల వరకూ వచ్చింది. మరో రెండు రోజుల్లో 'రంగులరాట్నం' సినిమా విడుదలకు సిద్ధంగా ఉంది. మరో పక్క పండగ నాడు ప్రేక్షకులు పిండి వంటలారగిస్తూ ఇంట్లో కూర్చొని వీక్షించేందుకు వీలుగా బుల్లితెరపై కొత్త సినిమాల హంగామా మొదలు కానుంది.

రేపట్నుంచే అనగా శనివారం నుండే బుల్లితెరపై కొత్త సినిమాల జాతర మొదలు కానుంది. ఎన్టీఆర్‌ ట్రిపుల్‌ రోల్‌లో వచ్చిన 'జై లవకుశ' సినిమాతో బుల్లితెర ప్రేక్షకులకు పండగ సందడి ప్రారంభం కానుంది. తర్వాత వరుసగా రవితేజ అంధుడిగా నటించిన 'రాజా ది గ్రేట్‌', మహేష్‌బాబు నటించిన 'స్పైడర్‌', యంగ్‌ హీరో శర్వానంద్‌ నటించిన 'మహానుభావుడు' చిత్రాలు ఈ సంక్రాంతికి బుల్లితెరపై సందడి చేయనున్నాయి. వీటిలో వసూళ్ల పరంగా 'జై లవకుశ' టాప్‌ ప్లేస్‌లో నిలవగా, 'స్పైడర్‌' నిరాశ పరిచింది. 

మిగిలిన రెండు చిత్రాలూ వాటి స్థాయికి ఫర్వాలేదనిపించిన చిత్రాలు కాగా, ఇప్పుడు బుల్లితెరపై టీఆర్‌పీ రేటింగ్స్‌ విషయంలో ఏ సినిమాది టాప్‌ ప్లేస్‌ అవుతుందో చూడాలి మరి. సినిమా రిలీజైన రోజు ఆ సినిమా రిజల్ట్‌ గురించి ఎలాగైతే ఎదురు చూస్తారో.. అలాగే ఇప్పుడు బుల్లితెరపై టీఆర్‌పీ రేటింగ్స్‌ని కూడా అలాగే కౌంట్‌ చేస్తున్నారు. ఈ సంక్రాంతి పండక్కి వెల్లువలా వచ్చేస్తూ, బుల్లితెర ప్రేక్షకుల్ని సరదా సంబరాల్లో ముంచేయడానికి సిద్ధమువుతున్న ఈ సినిమాల్లో ఏ సినిమాది టీఆర్‌పీ రేటింగ్స్‌ విషయంలో పై చేయి అవుతుందో చూడాలిక.