సినిమా పరిశ్రమలో అత్యంత ప్రతిష్టాత్మకంగా భావించే ఆస్కార్ వేడుకలు ఈ రోజు మొదలయ్యాయి. 96వ ఆస్కార్ వేడుకలకి లాస్ ఏంజిల్స్ లోని డాల్బీ థియేటర్ వేదిక అయ్యింది. నార్మల్ గా ఆస్కార్ అనగానే రెడ్ కార్పెట్ మెరుపులు, హీరోయిన్స్ హొయలొలికించే డ్రెస్ లు గుర్తుకు వస్తాయి. కానీ ఈ సారి ఈ వేడుకను మొత్తం తన వైపు తిప్పుకున్నాడు 'జాన్‌సీనా'. జాన్ సీనా ఆస్కార్ వేదిక పైకి ఎంట్రీ ఇచ్చిన తీరు అందరికీ షాకిచ్చింది. సోషల్ మీడియాలో తెగ ట్రెండ్ అవుతున్నాడు జాన్ సీనా.
అమెరికన్ పాపులర్ రెజ్లర్ WWE ఫేమ్ జాన్‌సీనా కు వరల్డ్ వైడ్ ఫాన్స్, ఫాలోవర్స్ ఉన్నారు. ఇండియన్ ప్రేక్షకులుకు కూడా జాన్‌సీనా పరిచయం ఉంది. ఇతను కేవలం రెజ్లర్ మాత్రమే కాదు యాక్టర్ కూడా. కొన్ని యాక్షన్ సినిమాల్లో నటించాడు. ఈ క్రమంలోనే 96 ఆస్కార్ వేడుకలకు జాన్‌సీనా కూడా వచ్చాడు. బెస్ట్ కాస్ట్యూమ్ డిజైనర్ అవార్డుని అనౌన్స్ చేయటానికి జాన్‌సీనా వేదికపైకి వచ్చాడు. ఎప్పుడు ఎవరు చేయని విధంగా ఒంటిమీద నూలు పోగు లేకుండా కంప్లీట్ న్యూడ్ గా స్టేజ్ పైకి వచ్చి అందర్నీ విస్మయానికి గురిచేశాడు. కేవలం విన్నర్ కార్డు మాత్రమే అడ్డుపెట్టుకుని ఇలా జాన్ స్టేజ్ మీదకి రావటంతో అంతా షాక్ అయ్యారు.
వెంటనే జాన్ స్పందించిన తీరుకి నవ్వులు విరబూశాయి. జాన్‌సీనా మైక్ తీసుకుని ‘‘మగాడి శరీరం జోక్ కాదు. కాస్ట్యూమ్స్ అనేవి చాలా ఇంపార్టెంట్ అనుకుంటా’’ అంటూ ఫ్రీజ్ అయిన వారిని రిలీజ్ చేశాడు. కొందరు జాన్ కు చీరలా చుట్టుకునే కాస్ట్యూమ్ ఒకటి స్టేజిపైనే వేశారు. నెక్స్ట్ జాన్‌సీనా బెస్ట్ కాస్ట్యూమ్ డిజైనర్ అవార్డుని ప్రకటించారు. ఈ అవార్డుని పూర్ థింగ్స్‌ సినిమాకు గాను హోలి వెడ్డింగ్‌ టన్‌ అందుకున్నారు. ఇలా ఆస్కార్ వేదికపైకి నగ్న ప్రదర్శన ఇదే మొదటిసారి కాదు.
సరిగ్గా 50 ఏళ్ల కిందట జరిగిన ఆస్కార్ వేడుకల్లోనూ ఇలానే జరిగింది. ఎలిజబెత్ టేలర్‌ స్టేజ్ మీదకి వస్తున్న టైమ్ లో ఓ వ్యక్తి నగ్నంగా స్టేజ్ మీదకు వచ్చి హల్‌చల్ చేశాడు. ఆస్కార్ అవార్డుల చరిత్రలో అదొక సంచలనంగా నమోదయ్యింది. ఇప్పుడు ఆ ఇన్సిడెంట్ ని గుర్తు చేసుకుంటూ జాన్ సీనా ఇలా చేసినట్లు నిర్వాహకులు ప్రకటించారు.
