వరుస విజయాలతో దూకుడు మీదున్న ఎన్టీఆర్‌ తదుపరి సినిమా మాటల మాంత్రికుడు త్రివిక్రమ్‌తో ఉండబోతోందని సమాచారమ్‌. త్రివిక్రమ్‌ సినిమాలో నటించాలని ఎన్టీఆర్‌ ఎప్పటి నుండో అనుకుంటున్నాడు. అది ఇప్పటికి నెరవేరబోతోంది. ప్రస్తుతం ఎన్టీఆర్‌ 'జై లవ కుశ' సినిమా చేస్తున్నాడు. రీసెంట్‌గా వచ్చిన ఈ సినిమా టీజర్‌ సంచలనాలు సృష్టిస్తోంది. ఈ సినిమా ఎన్టీఆర్‌ కెరీర్‌లోనే సూపర్‌ స్పెషల్‌. ఎందుకంటే ఎన్టీఆర్‌ తొలి సారిగా త్రిపాత్రాభినయం చేస్తున్న సినిమా ఇది. ఈ జనరేషన్‌ హీరోల్లో త్రిపాత్రాభినయం చేస్తుంది ఎన్టీఆరే. అప్పుడు 'ముగ్గురు మొనగాళ్లు' చిత్రంలో మెగాస్టార్‌ చిరంజీవి, ఇప్పుడు యంగ్‌ టైగర్‌ ఎన్టీఆర్‌ 'జై లవ కుశ' ట్రిపుల్‌ రోల్‌ సినిమాలు. అయితే ఈ సినిమాలో స్పెషాలిటీ ఏంటంటే ఎన్టీఆర్‌, నెగిటివ్‌ రోల్‌ కూడా చేయడం. అందుకే ఈ సినిమాపై భారీ అంచనాలున్నాయి. నందమూరి కళ్యాణ్‌రామ్‌ నిర్మాణంలో ఈ సినిమా రూపొందుతోంది. సినిమాని చాలా రిచ్‌గా భారీ బడ్జెట్‌తో తెరకెక్కిస్తున్నారు కళ్యాణ్‌రామ్‌. బాబీ దర్శకత్వం వహిస్తున్నారు. రాఖీ ఖన్నా, నివేదా థామస్‌ హీరోయిన్లుగా నటిస్తున్నారు. ఇప్పటికే ఎన్టీఆర్‌ గెటప్స్‌లో రెండు గెటప్స్‌ రివీల్‌ అయ్యాయి. నెగిటివ్‌ గెటప్‌నే ముందుగా రిలీజ్‌ చేసి షాకిచ్చింది చిత్ర యూనిట్‌. ఇక సాఫ్ట్‌ క్యారెక్టర్‌లో మరో గెటప్‌నీ రిలీజ్‌ చేశారు. ఇక పోతే ముచ్చటగా మూడో గెటప్‌ ఎలా ఉండబోతోందో త్వరలోనే తెలియనుంది. మరో పక్క త్రివిక్రమ్‌ సినిమా కోసం మళ్లీ న్యూ గెటప్‌ ట్రై చేసే ఆలోచనలో ఉన్నాడు ఎన్టీఆర్‌ అని విశ్వసనీయ వర్గాల సమాచారమ్‌. త్రివిక్రమ్‌ ప్రస్తుతం పవన్‌ కళ్యాణ్‌ సినిమాతో బిజీగా ఉన్నాడు.