బాలీవుడ్‌లో విద్యా బాలన్‌ నటించిన 'తుమ్హారీసులు' చిత్రం ఇటీవల ఘన విజయం సాధించిన సంగతి తెలిసిందే. మధ్య తరగతి గృహిణి పాత్రలో విద్యాబాలన్‌ నటన ఈ సినిమాలో ఆకట్టుకునేలా ఉంటుంది. అన్ని వర్గాల ప్రేక్షకుల్ని విశేషంగా అలరించిందీ సినిమా. ఇప్పుడీ సినిమాను తమిళంలో రీమేక్‌ చేయనున్నారు. జ్యోతిక హీరోయిన్‌గా ఈ సినిమా తెరకెక్కుతోంది. రాధామోహన్‌ ఈ చిత్రానికి దర్శకత్వం వహిస్తున్నారు. 

ఈ సినిమా చూడగానే ఇలాంటి సినిమాలో తాను నటించాలని అనుకున్నారట జ్యోతిక. ఆ అవకాశం తనకే వచ్చినందుకు చాలా సంతోషంగా ఉందని చెబుతున్నారు జ్యోతిక. అలాగే విద్యాబాలన్‌ మంచి నటి. ఎలాంటి పాత్రలోనైనా ఆమె చక్కగా ఒదిగిపోగలదు. ఒరిజినల్‌లో ఆ పాత్రకు ఏమాత్రం తీసిపోకుండా తాను నటించి, మెప్పిస్తానంటోంది జ్యోతిక. తమిళ హీరో సూర్యని వివాహం చేసుకున్న జ్యోతిక, కొన్నాళ్లు సినిమాలకు దూరంగా ఉన్నారు. ఆ తర్వాత ఈ మధ్యనే సెకండ్‌ ఇన్నింగ్స్‌ స్టార్ట్‌ చేశారు. సెకండ్‌ ఇన్నింగ్స్‌లో విభిన్న కధాంశాలను ఎంచుకుంటూ, హుందా అయిన పాత్రలతో ఆకట్టుకుంటున్నారు జ్యోతిక. 

ఇటీవలే 'నాచియార్‌' సినిమాలో పవర్‌ఫుల్‌ పోలీసాఫీసర్‌ పాత్రలో కనిపించి, విమర్శకుల ప్రశంసలు అందుకుంది. తాజాగా రాధామోహన్‌ దర్శకత్వంలో రానున్న 'తుమ్హారీసులు' రీమేక్‌తో పాటు మణిరత్నం సినిమాలోనూ జ్యోతిక నటిస్తోంది. వయసుకు తగ్గ పాత్రలను ఎంచుకుంటూ, సెకండ్‌ ఇన్నింగ్స్‌లో కూడా జ్యోతిక ఫుల్‌ బిజీగా గడుపుతోంది.