దీపముండగానే ఇల్లు చక్కబెట్టుకోవాలన్నారు పెద్దలు. ఈ సూత్రాన్ని సీనియర్‌ భామ కాజల్‌ అగర్వాల్‌ తూచా తప్పకుండా పాఠించేస్తోంది. కెరీర్‌ ముగిసిపోయిందనుకున్న టైంలో కాజల్‌ని 'ఖైదీ' సినిమాతో మెగాస్టార్‌ చిరంజీవి ఆదుకోవడంతో, మళ్లీ కాజల్‌ కెరీర్‌కి మెగా బూస్టప్‌ వచ్చింది. ఆ తర్వాత యంగ్‌ హీరో అయిన రానాతో 'నేనే రాజు నేనే మంత్రి' సినిమాతో బ్లాక్‌ బస్టర్‌ హిట్‌ కొట్టి, తన కెరీర్‌కి ఇప్పట్లో ఢోకా లేదనిపించుకుంది. ఆ తర్వాత చిన్నా, పెద్ద అనే తేడా లేకుండా వచ్చిన ప్రతీ అవకాశాన్నీ ఉపయోగించేసుకుంటోంది వరుసగా కాజల్‌.
అందులో భాగంగా లేటెస్టుగా యంగ్‌ హీరో బెల్లంకొండ సాయి శ్రీనివాస్‌ సినిమాకి హీరోయిన్‌గా కాజల్‌ సైన్‌ చేసింది. శ్రీనివాస్‌ దర్శకత్వంలో ఈ సినిమా తెరకెక్కుతోంది. ఇటీవలే ఈ సినిమా షూటింగ్‌ ప్రారంభమైంది. వెరీ లేటెస్టుగా కాజల్‌ షూటింగ్‌కి హాజరైంది. స్టార్‌డమ్‌తో సంబంధం లేకుండా, స్క్రీన్‌పై స్టార్‌ హీరోయిన్లతో ఆడి పాడేస్తుంటాడు బెల్లంకొండ.
మొదట్నుంచీ బెల్లంకొండ ఖాతాలో స్టార్‌ హీరోయిన్స్‌ లిస్టు చెప్పుకోదగ్గదే. సమంత, తమన్నా, పూజా హెగ్దే.. ఇలా చెప్పుకుంటూ పోతే ఆ లిస్టులోకి ఇప్పుడు కాజల్‌ వచ్చి చేరింది. ప్రస్తుతం 'సాక్ష్యం' సినిమాలో నటిస్తున్నాడు బెల్లంకొండ శ్రీనివాస్‌. శ్రీవాస్‌ దర్శకత్వంలో ఈ సినిమా తెరకెక్కుతోంది. కాగా ఇటీవల కళ్యాణ్‌రామ్‌తో 'ఎమ్మెల్యే' సినిమాతో ప్రేక్షకుల ముందుకు వచ్చిన కాజల్‌ ఇంకోవైపు మరో యంగ్‌ హీరో శర్వానంద్‌తోనూ స్క్రీన్‌ షేర్‌ చేసుకుంటోంది.
