స్వర్గీయ నందమూరి తారకరామారావు జీవిత చరిత్ర ఆధారంగా తెరకెక్కుతోన్న 'ఎన్‌టిఆర్‌ బయోపిక్‌'లో నందమూరి కళ్యాణ్‌రామ్‌ నటిస్తున్నాడు. చైతన్యరధం ముందర, బాబాయ్‌ బాలకృష్ణతో కలిసి వున్న ఓ ఫొటోని సోషల్‌ మీడియాలో షేర్‌ చేశాడు కళ్యాణ్‌రామ్‌. 

చైతన్య రధ సారధి అంటే హరికృష్ణ అని అందరికీ తెలుసు. ఇటీవల హరికృష్ణ రోడ్డు ప్రమాదంలో మరణించారు. ఆ హరికృష్ణ పాత్రలో కళ్యాణ్‌రామ్‌ నటించాల్సి రావడం భావోద్వేగంతో కూడుకున్న అంశమే. అదే హరికృష్ణ జీవించి వుంటే, కళ్యాణ్‌రామ్‌.. ఎంతో ఉత్సాహంగా ఆ పాత్రలో నటించడానికి సిద్ధపడేవాడే. అలా నటించినందుకు కళ్యాణ్‌రామ్‌ ఆనందం.. ఓ రేంజ్‌లో వుండేది. ఇప్పుడూ ఆ ఆనందం వుంది.. కానీ, అదిప్పుడు భావోద్వేగంతో కూడుకున్నది. కొంత ఆవేదనతో కూడుకున్న సందర్భమిది. 

బాలకృష్ణ - ఆయన తండ్రి స్వర్గీయ ఎన్టీఆర్‌ పాత్రలో నటిస్తున్నారు. కళ్యాణ్‌రామ్‌ - ఆయన తండ్రి స్వర్గీయ హరికృష్ణ పాత్రలో నటిస్తున్నారు. ఈ సినిమాని రెండు భాగాలుగా ప్రేక్షకుల ముందుకు తీసుకొస్తున్న సంగతి తెల్సిందే. అందులో ఒకటి 'ఎన్‌టిఆర్‌ కథానాయకుడు' కాగా, ఇంకొకటి 'ఎన్‌టిఆర్‌ మహా నాయకుడు'. ఈ సినిమా షూటింగ్‌ హైద్రాబాద్‌లో జరుగుతోంది. తెలుగుదేశం పార్టీని స్థాపిస్తున్నట్లు ఎన్టీఆర్‌ చేసిన ప్రకటన తాలూకు సన్నివేశాల చిత్రీకరణ జరుగుతోందిప్పుడు. 

దర్శకుడు క్రిష్‌ ఈ సన్నివేశాల్ని ఎంతో అద్భుతంగా రూపొందిస్తున్నాడట. ఈ సినిమాలో శ్రీదేవి పాత్రలో రకుల్‌ ప్రీత్‌ సింగ్‌, చంద్రబాబు పాత్రలో దగ్గుబాటి రానా నటిస్తున్న సంగతి తెల్సిందే.