పవన్‌కళ్యాణ్‌ తాజా చిత్రం 'కాటమరాయుడు' టాక్‌కి భిన్నంగా వసూళ్ళను సాధిస్తోంది. తొలి రోజు డివైడ్‌ టాక్‌ రావడం, ఆ తరువాత మరో 'సర్దార్‌ గబ్బర్‌సింగ్‌' అనే కామెంట్స్‌ ఎదుర్కొనడంతో 'కాటమరాయుడు'కి వసూళ్ళ జాతర కష్టమేనని అందరూ అనుకున్నారు. అయితే ఎవరి ఊహలకూ అందకుండా 'కాటమరాయుడు' డీసెంట్‌ వసూళ్ళను సాధిస్తోంది. రెండో వారాంతంలో కూడా 'కాటమరాయుడు' ఓ మోస్తరుగా వసూళ్ళను సాధించడం ట్రేడ్‌ పండితులను కూడా ఆశ్చర్యానికి గురిచేసింది. ఆదివారం నాటికే 'కాటమరాయుడు' సినిమా 60 కోట్ల మార్క్‌ని దాటిందని సమాచారమ్‌. బాలీవుడ్‌ ట్రేడ్‌ అనలిస్ట్‌ తరణ్‌ ఆదర్శ్‌, ఓవర్సీస్‌లో 'కాటమరాయుడు' మొత్తం 7.38 కోట్ల వసూళ్ళు సాధించిందని తాజాగా పేర్కొన్నాడు. ఇది చిన్న విషయం కాదు. డివైడ్‌ టాక్‌తో ఈ వసూళ్లు అంటే ఆశ్యర్యపోవడం అందరి వంతవుతోంది. 1.13 మిలియన్‌ డాలర్లు ఓవరాల్‌గా సొంతం చేసుకుంది 'కాటమరాయుడు'. అయితే సినిమాకి జరిగిన బిజినెస్‌ దృష్ట్యా ఈ వసూళ్ళు సరిపోవనే అభిప్రాయం ట్రేడ్‌ పండితుల్లో ఇంకా వినవస్తోంది. ఏది ఏమైనా పవన్‌ కళ్యాణ్‌ స్టామినా అంటే ఇది అని అభిమానులు ప్రూవ్‌ చేశారు ఈ సినిమాతో. డాలీ దర్శకత్వంలో తెరకెక్కిన ఈ సినిమాలో శృతిహాసన్‌ కథానాయికగా నటించింది. మరో సారి ఈ జంట లక్కీ జంట అని డిసైడ్‌ అయిపోయింది.