క్రిష్‌ మరో హిస్టారికల్‌ మూవీకి పచ్చ జెండా ఊపారు. 'గౌతమీ పుత్ర శాతకర్ణి' సినిమాతో ఓ చక్కని తెలుగు చిత్రాన్ని తెలుగు ప్రజలు గర్వపడేలా చిత్రీకరించి ప్రముఖుల ప్రశంలసలు అందుకున్నాడు క్రిష్‌. ఇప్పుడు బాలీవుడ్‌లో ఓ హిస్టారికల్‌ మూవీని తెరకెక్కించబోతున్నాడు. బాలీవుడ్‌ క్వీన్‌ కంగనా రనౌత్‌ ఈ సినిమాలో ప్రధాన పాత్ర పోషిస్తోంది. వీరనారి ఝాన్సీ లక్ష్మీభాయ్‌ జీవిత గాధని క్రిష్‌ తెరకెక్కిస్తున్నాడు. 'మణికర్ణిక' అనే అద్భుతమైన టైటిల్‌ని ఫిక్స్‌ చేశారు ఈ సినిమాకి. బాలీవుడ్‌ సినిమా అయినప్పటికీ ఈ సినిమాని హాలీవుడ్‌ స్థాయిలో రూపొందించనున్నాడట క్రిష్‌. ప్రతీ సన్నివేశంలోనూ ప్రేక్షకునికి రోమాలు నిక్కబొడుచుకునే ఫీల్‌ కలిగేలా ఈ సినిమాను తెరకెక్కించాలనుకుంటున్నాడట క్రిష్‌. ఇప్పటికే ఈ సినిమాపై చాలా గ్రౌండ్‌ వర్క్‌ చేసేశాడు క్రిష్‌. దేశ భక్తి ఉట్టి పడే సినిమా ఇది. మరో పక్క కంగనా రనౌత్‌ విషయానికి వస్తే, ఆమె సినిమాలో తన పాత్రకి ఎంత డెడికేషన్‌తో పని చేస్తుందో ప్రత్యేకించి చెప్పనక్కర్లేదు. ఇంతకు ముందెన్నడూ లేనంత కొత్త మేకోవర్‌ని కంగనాలో చూస్తామట ఈ సినిమాతో. కత్తి విద్యల్లోనూ, గుర్రపు స్వారీలోనూ ప్రత్యేక శిక్షణ తీసుకుంటోంది కంగనా. హిందీలో తెరకెక్కుతోన్న ఈ సినిమాని తెలుగు, తమిళంతో పాటు, ఇంగ్లీష్‌లో కూడా ఒకేసారి డబ్‌ చేసి విడుదల చేసే యోచనలో చిత్ర యూనిట్‌ ఉన్నట్లు తెలుస్తోంది. కంగనా ఈ సినిమా కోసం పవిత్ర గంగానదిలో పవిత్ర స్నానం ఆచరించి షూటింగ్‌లో పాల్గొనడం విశేషం. ఇండియాలోని పలు చారిత్రక ప్రదేశాల్లో ఈ చిత్రం షూటింగ్‌ జరుపుకోనుంది.