క్రిష్‌.. క్లాస్ ట‌చ్ ఉన్న ద‌ర్శ‌కుడు. గ‌మ్యం, వేదం, కంచె.. ఇలా విభిన్న‌మైన క‌థ‌ల్ని ఆయ‌న తెర‌పై చూపించారు. అన్ని చోట్లా క్లాస్ ట‌చ్చే. ఇందుకు పూర్తి విరుద్ధం.. హ‌రీష్‌శంక‌ర్‌. ఆయ‌న‌దంతా మాస్ మార్కు. గ‌బ్బ‌ర్‌సింగ్‌, గ‌ద్ద‌ల కొండ గ‌ణేష్ సినిమాలు చూస్తే తెలిసిపోయింది ఆయ‌న స్టైలేంటో? వీరిద్ద‌రూ క‌లిస్తే ఎలా ఉంటుంది? క్లాసూ, మాసూ క‌ల‌యిక‌లో ఎలాంటి అద్భుతాలొస్తాయి? ఈ ప్ర‌శ్న‌కు స‌మాధానం త్వ‌ర‌లోనే తెలిసిపోనుంది. ఎందుకంటే వీరిద్ద‌రూ జ‌ట్టు క‌ట్ట‌బోతున్నారు. సినిమా కోస‌మైతే కాదు. వెబ్ సిరీస్‌ల కోసం.

క్రిష్, హ‌రీష్ ఉమ్మ‌డి నిర్మాణంలో త్వ‌ర‌లోనే కొన్ని వెబ్ సిరీస్‌లు రాబోతు్నాయి. ఆహా, హాట్ స్టార్‌ల కోసం ఈ వెబ్ సిరీస్‌ల‌ను రూపొందిస్తున్నారు. వీలైతే ఈ వెబ్ సిరీస్‌ల‌కు ఉమ్మ‌డిగా ద‌ర్శ‌క‌త్వం కూడా వ‌హిస్తారు. అయితే ప్ర‌స్తుతం వీరిద్ద‌రి చేతిల్లో సినిమాలున్నాయి. ఇద్ద‌రూ ప‌వన్ తోనే సినిమాలు చేయ‌బోతున్నారు. వాటికి సంబంధించిన ప‌నులు జ‌రుగుతున్నాయి. ఆయా సినిమాలుతో పాటు ఈ వెబ్ సిరీస్‌ల‌నూ రూపొందించ‌నున్నారు. త్వ‌ర‌లోనే వాటికి సంబంధించిన వివ‌రాలు బ‌య‌ట‌కు వ‌స్తాయి.