ఈ మధ్య చిన్న సినిమాలే అయినా కానీ పబ్లిసిటీ విషయంలో హంగామా ఎక్కువగా ఉంటోంది. తాజాగా ఓ చిన్న సినిమా ఇప్పుడు వార్తల్లో నిలిచింది. అదే 'కాదలి'. ఈ సినిమా ఫస్ట్‌లుక్‌ పోస్టర్‌ని భళ్లాలదేవ రానా విడుదల చేయగా, ఒక సోలో ఆడియో ట్రాక్‌ని ముద్దుగుమ్మ సమంత సోషల్‌ మీడియాలో విడుదల చేసింది. దాంతో ఈ సినిమాకి కొంచెం క్రేజ్‌ వచ్చింది. ఇప్పుడు ఈ సినిమా ఆడియో ఫంక్షన్‌ వేడుక మరో ట్రెండింగ్‌ అయ్యింది. ఎందుకంటే ఈ వేడుకకు మెగా పవర్‌ స్టార్‌ రామ్‌ చరణ్‌ గెస్ట్‌గా వస్తున్నారు. అంతేకాదు తెలంగాణా మంత్రి కేటీఆర్‌ కూడా ఈ ఫంక్షన్‌కి స్పెషల్‌ గెస్ట్‌గా రానున్నారు. దాంతో ఈ సినిమా ఆడియో వేడుక ఇప్పుడు ట్రెండింగ్‌ అయిపోయింది. చిన్న సినిమానే అయినా కానీ పెద్ద పబ్లిసిటీ వచ్చేసింది ఈ సినిమాకి. ఈ మధ్య చిన్న సినిమాల ప్రమోషన్స్‌లో దర్శక నిర్మాతలు క్రియేటివ్‌గా ఆలోచిస్తున్నారు. మొన్నీ మధ్యనే విడుదలైన 'శ్రీరాముడింట శ్రీ కృష్ణుడంట' సినిమాకి ప్రమోషన్‌ కొత్తగా చేశారు. సినిమా బాగోపోతే ఫోన్‌ చేసి చెప్పండి అంటూ నెంబర్‌ కూడా ఇచ్చి హల్‌చల్‌ చేసింది ఆ చిత్ర టీమ్‌. సినిమా విడుదలయ్యాక రిజల్ట్‌ ఏంటనేది పక్కన పెడితే, ఆ సినిమా ప్రమోషన్‌ విషయంలో చిత్ర యూనిట్‌ న్యూ అటెంప్ట్‌ని అంతా మెచ్చుకున్నారు. అలాగే ఇప్పుడు సినిమాల పరంగా ఓ ప్రముఖ హీరో, రాజకీయాల పరంగా ఓ ప్రముఖ వ్యక్తిని తీసుకొచ్చి ఆడియో ఫంక్షన్‌కి అదనపు ఆకర్షణ తీసుకొచ్చింది ఈ చిత్ర టీమ్‌. ట్రయాంగిల్‌ లవ్‌ స్టోరీగా తెరకెక్కుతోన్న ఈ సినిమాకి పట్టాబి ఆర్‌ చిలుకూరి దర్శక నిర్మాతగా వ్యవహరిస్తున్నారు.