శతమానం భవతి హిట్ తో మంచి ఊపు మీదున్న శర్వానంద్, భలే భలే మగాడివోయ్ తో మంచి ఫీల్ గుడ్ మూవీని అందించిన డైరెక్టర్ మారుతి కాంబినేషన్ లో వచ్చిన చిత్రం మహానుభావుడు.

దసరా సందర్భంగా రెండు పెద్ద సినిమాల మధ్య విడుదల అయిన ఈ సినిమా మంచి విజయాన్ని అందుకుంది. యూవీ క్రియేషన్స్ బ్యానర్ లో 'రన్ రాజా రన్', 'ఎక్స్ ప్రెస్ రాజా'వంటి చిత్రాలు చేసిన శర్వానంద్, ఈ సినిమాతో హ్యాట్రిక్ విజయాన్ని అందుకున్నాడు.

ఇప్పుడు ఈ సినిమా కలెక్షన్స్ కూడా అదిరిపోతున్నాయి. తొలివారంలో ఈ సినిమా 32.2 కోట్లు రాబట్టినట్టు ట్రేడ్ ఎనలిస్ట్ రమేష్ బాలా వెల్లడించాడు. వసూళ్ల విషయంలో ఇదే జోరు కొనసాగితే 50 కోట్ల మార్క్ చాలా సులభంగా దాటేస్తుందని ట్రేడ్ వర్గాలు చెబుతున్నాయి.

ఇదే జరిగితే శర్వానంద్ ఖాతాలో 'శతమానం భవతి' చిత్రం తర్వాత మరో 50 కోట్ల చిత్రంగా ఇది నిలిచిపోయే అవకాశం ఉంది.