మహేష్‌ అభిమానులకి గుడ్‌ న్యూస్‌. సినిమా షూటింగ్‌ మే నెలాఖరుకి పూర్తయిపోతుంది. మే 2 నుంచి సినిమాకి అత్యంత కీలకమైన క్లయిమాక్స్‌ని షూట్‌ చేయనున్నారని తెలియవస్తోంది. జూన్‌ 23న సినిమా విడుదలవుతుందని ముందుగా అనౌన్స్‌ చేసినా, రిలీజ్‌ డేట్‌లో కొంత కన్‌ఫ్యూజన్‌ ఉంది. ఆ కన్‌ఫ్యూజన్‌కి అతి త్వరలో క్లారిటీ ఇవ్వనున్నారట చిత్ర యూనిట్‌. సినిమా షూటింగ్‌ పూర్తయిపోతే, పోస్ట్‌ ప్రొడక్షన్‌ కార్యక్రమాలు పూర్తి చేసెయ్యడానికి పెద్దగా టైమ్‌ పట్టకపోవచ్చు. మహేష్‌ హీరోగా నటిస్తున్న ఈ చిత్రానికి ఎ.ఆర్‌.మురుగదాస్‌ దర్శకత్వం వహిస్తున్నాడు. తెలుగులో స్ట్రెయిట్‌గా మురుగదాస్‌ చేస్తున్న రెండో సినిమా ఇది. ఇంతకు ముందు మురుగదాస్‌, మెగాస్టార్‌ చిరంజీవితో 'స్టాలిన్‌' సినిమాని రూపొందించాడు. తరువాత మురుగదాస్‌ తెలుగులో సినిమాలు చేయలేదు. చాలా కాలం తర్వాత తాజాగా సూపర్‌స్టార్‌తో ఈ సినిమా చేయబోతున్నాడు. ఈ సినిమాపై భారీగా అంచనాలు నెలకొన్నాయి. మహేష్‌ కెరీర్‌లోనే భారీ బడ్జెట్‌ మూవీగా ఈ సినిమా తెరకెక్కుతోంది. మహేష్‌ సరసన ఈ సినిమాలో రకుల్‌ ప్రీత్‌ సింగ్‌ హీరోయిన్‌గా నటిస్తోంది. విలన్‌గా ప్రముఖ దర్శకుడు ఎస్‌.జె. సూర్య నటిస్తున్నాడు. తెలుగు, తమిళ భాషల్లో ఒకేసారి ఈ సినిమా ప్రేక్షకుల ముందుకు రానుంది. మహేష్‌ ఫ్యాన్స్‌ ఈ సినిమా కోసం ఎంతగానో ఎదురు చూస్తున్నారు. ఎప్పుడెప్పుడు మహేష్‌ సినిమా అంటూ ఆశక్తిగా ఉన్నారు. సినిమా విడుదల విషయంలో వస్తున్న రూమర్స్‌ ఫ్యాన్స్‌ని మరింత బాధపెడుతున్నాయి. అయితే ఈ తాజా సమాచారమ్‌ ఒకింత ఫ్యాన్స్‌లో ఉత్సాహాన్ని నింపే అవకాశం ఉందని చెప్పవచ్చు.