సూపర్‌స్టార్‌ మహేశ్‌బాబుకి ఓ సెంటిమెంట్ వుంది. మహేష్ తన సినిమా ముహూర్తానికి వెళ్లరు. మహేష్ లేకుండానే పూజా కార్యక్రమాలు జరుగుతాయి. ఇప్పుడు ఆయన కొత్త సినిమా విషయంలో కూడా అదే సెంటిమెంట్ కొనసాగింది. మహేష్- త్రివిక్రమ్‌ శ్రీనివాస్‌ కలయికలో ఓ రూపుదిద్దుకోనుంది. హారికా హాసిని క్రియేషన్స్‌ పతాకంపై చినబాబు ఈ చిత్రాన్ని నిర్మిస్తున్నారు. గురువారం ఈ సినిమాకు సంబంధించిన పూజా కార్యక్రమం హైదరాబాద్‌లోని రామానాయుడు స్టూడియోస్‌లో జరిగింది. చిత్రబృందంతోపాటు మహేశ్‌బాబు సతీమణి నమ్రత ఈ వేడుకలో పాల్గొన్నారు. హీరోయిన్ పూజాహెగ్డే కూడా పూజా కార్యక్రమానికి హాజరైయింది. మహేష్ మాత్రం తన సెంటిమెంట్ ప్రకారం ముహూర్తానికి రాలేదు. ‘అతడు’, ‘ఖలేజా’ చిత్రాల తర్వాత మహేశ్‌-త్రివిక్రమ్‌ కాంబినేషన్‌లో తెరకెక్కుతోన్న హ్యాట్రిక్‌ చిత్రమిది. దీంతో ఈ సినిమాపై అభిమానుల్లో భారీగా అంచనాలున్నాయి. చిత్రానికి తమన్ మ్యూజిక్.