విలక్షణ దర్శకుడు సుకుమార్‌ ప్రయోగాల బాట పట్టాడు. 'రంగస్థలం' లాంటి వెండితెర అద్భుతాన్ని రూపొందించి, సంచలన విజయాన్ని అందుకున్న ఈ దర్శకుడు తన తదుపరి సినిమాని కూడా ఓ ప్రయోగాత్మక కథతోనే రూపొందించబోతున్నాడట. ఇందుకు సూపర్‌ స్టార్‌ మహేష్‌బాబు నుంచి కూడా గ్రీన్‌ సిగ్నల్‌ వచ్చినట్లు తెలుస్తోంది. 

ముందుగా మహేష్‌తో మాంఛి కమర్షియల్‌ ఎంటర్‌టైనర్‌ని అనుకున్నాడు సుకుమార్‌. అయితే మహేష్‌ కూడా ఈ మధ్య ప్రయోగాల పట్ల ఆసక్తి చూపిస్తున్నాడు. రొటీన్‌ కమర్షియల్‌ ఎంటర్‌టైనర్స్‌ బోర్‌ కొట్టేయకపోయినా, కొత్తదనంతో కొత్త కొత్తగా ప్రేక్షకుల్ని ఆకట్టుకోవాలనే ఆలోచనతో వున్న మహేష్‌, సుకుమార్‌ని ఆ దిశగా కథ రెడీ చేయమని చెప్పాడట. హీరో నుంచి వచ్చిన సూచనతో సుకుమార్‌, పీరియాడికల్‌ బ్యాక్‌ డ్రాప్‌లో ఓ సూపర్బ్‌ స్టోరీ రెడీ చేసినట్లు తెలుస్తోంది. 

'రంగస్థలం' కూడా అంతే. అది 85ల నాటి నేటివిటీతో రూపొందింది. ఆనాటి పరిస్థితుల్ని సుకుమార్‌ అత్యద్భుతంగా ఆ సినిమాలో చూపించి, నేటి తరాన్ని మెప్పించడం తెలిసిన సంగతే. నిజానికి ఇది చాలా పెద్ద రిస్క్‌. ఆ రిస్క్‌ చేసి సూపర్‌ హిట్‌ కొట్టిన సుకుమార్‌పై మహేష్‌, పూర్తి నమ్మకం పెట్టుకోవడం సహజమే. 

సుకుమార్‌, మహేష్‌ కాంబినేషన్‌లో ఇదివరకు '1 నేనొక్కడినే' సినిమా వచ్చింది. అదొక సూపర్బ్‌ థ్రిల్లర్‌. అయితే కొన్ని కారణాలతో ఆ సినిమా అంచనాల్ని అందుకోలేకపోయింది. అయినాసరే, ఇంకోసారి సుకుమార్‌తో సినిమాని 'ప్రయోగానికి' వేదికగానే మార్చుకున్నాడు మహేష్‌. పీరియాడికల్‌ బ్యాక్‌డ్రాప్‌ అంటే, స్వాతంత్య్ర పోరాటం లాంటివని అనుకోవచ్చా.? వేచి చూడాల్సిందే.