ఎవరీ మహేష్ అనుకుంటున్నారా? ఇంకెవరులే కొరటాల శివ సినిమాలో సూపర్‌ స్టార్‌ మహేష్‌బాబు సంధిస్తున్న అస్త్రాలు అనుకుంటున్నారా? అయితే అచ్చంగా తప్పులో కాలేసినట్లే. ఈ మహేష్ మన మహేష్‌బాబు కానే కాదు. ఈ మహేష్ 'కత్తి మహేష్'.
ఈ పేరుకు పెద్దగా పరిచయం అక్కర్లేదనుకుంటా. ఈ మధ్య టీవీ ఛానెల్స్‌లో ఈయన పేరు మార్మోగిపోతోందిలెండి. మంచి సినీ విమర్శకుడు కత్తి మహేష్. అయితే 'బిగ్‌బాస్‌' షో ద్వారా బాగా పాపులర్‌ అయ్యాడు. ఆ తర్వాత తన పాపులారిటీని విస్తరించేందుకు అవసరమైన కసరత్తులన్నీ చేస్తున్నాడు ఈ మధ్య. ఇంట్రెస్టింగ్‌ డిస్కషన్స్‌లో విరివిగా పాల్గొంటున్నాడు. వివాదాలకు కేంద్ర బిందువౌతున్నాడు.
అయితే ఈయన ఇప్పుడు ఓ సినిమా తెరకెక్కించబోతున్నారట. ఆ సినిమా పొలిటికల్‌ సెటైర్స్‌ నేపథ్యంలో ఉండబోతోందట. ప్రస్తుత రాజకీయాలపై ఓ అస్థ్రం సంధించబోతున్నాడట కత్తి మహేష్. గతంలో కత్తి మహేష్ దర్శకుడిగా 'పెసరట్టు' అనే సినిమా తీశాడు. ఆ తర్వాత 'హృదయ కాలేయం' తదితర చిత్రాల్లో చిన్న చిన్న పాత్రల్లో నటించాడు. అయితే 'బిగ్‌బాస్‌' షో ద్వారానే బాగా పాపులర్‌ అయ్యాడు. ఆ తర్వాత నుండీ అందరూ కత్తిమహేష్‌ని గుర్తిస్తున్నారు.
ఎప్పుడూ సోషల్‌ మీడియాలో కత్తి మహేష్ యాక్టివ్‌గానే ఉంటాడు. సినిమాలకి సంబంధించే కాకుండా, సమాజంలోని ఇతర విషయాలపై కూడా తరచూ స్పందిస్తూ ఉంటాడు. తాజాగా రాజకీయాలపై సినిమా తెరకెక్కిస్తున్నాననీ ప్రకటించాడు. ప్రస్తుతం స్క్రిప్టు పనులు జరుగుతున్నాయట. జనవరిలో సినిమా స్టార్ట్‌ కానుందట. అదీ మహేష్ కత్తిగారి కొత్త సినిమా ముచ్చట.
