గత వారం రోజులుగా టీవీ చానల్స్ లో, సోషల్ మీడియాలో ఎక్కువ వినిపిస్తున్న పేరు కత్తి మహేష్. ఎన్టీఆర్ బిగ్ బాస్ షో మొదలయ్యే వరకు కత్తి మహేష్ గురించి చాలామందికి తెలియదు. ఇంతకీ ఈ మహేష్ ఎవరో కాదు, సినిమా ప్రీమియర్ షోస్ లో మిగతా జర్నలిస్టులతో కలిసి, రివ్యూలు రాసే ఓ వ్యక్తి.

గతంలో ఒకటి, రెండు సినిమాలకి దర్శకత్వం వహించిన అనుభవం కూడా వుంది. మంచి జర్నలిస్ట్ కూడా అయిన మహేష్, సినిమా అవకాశాల కోసం ఎదురుచూస్తూ ఉంటాడు. అయితే బిగ్ బాస్ షోతో వచ్చిన పేరు, సరైన అవకాశాలు తెచ్చిపెడుతుందో లేదో తెలియదు కానీ, పవన్ కళ్యాణ్ ని విమర్శించడం ద్వారా మంచి పబ్లిసిటీ వచ్చేసింది.

ప్రతిరోజూ న్యూస్ పేపర్స్ లో ఫుల్ పేజ్ ఇంటర్వ్యూ లు, టీవీ ఛానల్స్ ఫేస్ టు ఫేస్ కార్యక్రమాలతో బిజీగా మారిపోయాడు. మొన్నీ మధ్య పాపులర్ న్యూస్ ఛానల్  NDTV కి కూడా ఇంటర్వ్యూ ఇస్తూ కనిపించాడు కత్తి మహేష్.

ఇది ఇలా ఉంటే మొన్న TV9  లైవ్ లో మాట్లాడుతూ, పవన్ కళ్యాణ్ ఫాన్స్ ఆగ్రహానికి గురై మళ్ళీ వార్తల్లో వ్యక్తిగా నిలిచాడు. ఒక హీరో ని అభిమానించే ఫాన్స్, ఎంత అమాయకంగా, మూర్ఖంగా ఉంటారో మహేష్ కి ఈ పాటికే అర్ధమై ఉండాలి.

మహేష్ గతంలో కూడా కొన్ని సినిమాలకి క్రిటికల్ ఇంటర్వ్యూ లు రాసి ఫాన్స్ ఆగ్రహానికి గురైన సందర్భాలు ఉన్నాయి. ప్రస్తుతానికి రావలసిన పబ్లిసిటీ అయితే మాత్రం ఫుల్ గా వచ్చింది, దాంతో పాటు సినిమా అవకాశాలు కూడా వస్తే బాగుంటుందని అతని సన్నిహితులు వాపోతున్నారు.