సూపర్‌ స్టార్‌ మహేష్‌ దూకుడు పెంచేశాడు. ఒక పక్క మురుగదాస్‌తో చేస్తున్న సినిమా 'స్పైడర్‌' సెట్స్‌ మీద ఉండగానే మహేష్‌ మరో సినిమాని పట్టాలెక్కించేశాడు. కొరటాల శివ దర్శకత్వంలో మహేష్‌ బాబు ఓ సినిమా చేయనున్నాడన్న సంగతి తెలిసిందే. దానికి 'భరత్‌ అను నేను' అనే ఇంట్రెస్టింగ్‌ టైటిల్‌ని అనుకుంటున్నారు. ఈ సినిమా షూటింగ్‌ నేడే ప్రారంభమయ్యింది. షూటింగ్‌ ప్రారంభం రోజే సినిమా రిలీజ్‌ డేట్‌ కూడా అనౌన్స్‌ చేసేశారు.. అంటేనే అర్ధమవుతోంది మహేష్‌ ఎంత స్పీడు మీదున్నాడో. జనవరి 11న ఈ సినిమా విడుదల కానుంది. అంటే 2018 సంక్రాంతికి ఇప్పుడే స్లాట్‌ ఫిక్స్‌ చేసేశాడన్న మాట మహేష్‌. మహేష్‌ - కొరటాల శివ కాంబినేషన్‌లో తెరకెక్కిన 'శ్రీమంతుడు' బ్లాక్‌ బస్టర్‌ హిట్‌గా నిలిచింది. ఆ తర్వాత వీరిద్దరి కాంబినేషన్‌లో తెరకెక్కుతోన్న చిత్రం కావడంతో అంచనాలు ఆకాశాన్నంటేలా ఉన్నాయి. పొలిటికల్‌ బ్యాక్‌ డ్రాప్‌లో ఈ సినిమా కథ ఉండబోతోందని ప్రచారం జరుగుతోంది. మరో వైపు 'స్పైడర్‌' సినిమా విడుదలకి సిద్ధమవుతోంది. ఆగష్టులో ఈ సినిమా ప్రేక్షకుల ముందుకు రానుంది. ముద్దుగుమ్మ రకుల్‌ ప్రీత్‌ సింగ్‌ హీరోయిన్‌గా నటిస్తోంది ఈ సినిమాలో. తమిళ డైరెక్టర్‌ ఎస్‌.జె.సూర్య విలన్‌గా నటిస్తున్నారు. యంగ్‌ హీరో భరత్‌ ఓ కీలక పాత్ర పోషిస్తున్నాడు. ఇంటెలిజెన్స్‌ ఆఫీసర్‌ పాత్రలో మహేష్‌ నటిస్తున్నాడు ఈ సినిమాలో.