మంచువారబ్బాయ్‌ విష్ణు కొత్త సినిమాకి ఓకే చేశాడు. జిఎస్‌ కార్తీక్‌ దర్శకత్వంలో మంచు విష్ణు హీరోగా రూపొందనున్న సినిమా ఈ రోజే లాంఛనంగా ప్రారంభమయ్యింది. తెలుగుతోపాటు, తమిళంలోనూ ఏకకాలంలో ఈ సినిమా నిర్మితమవుతుంది. తెలుగు, తమిళ నేటివిటీలను మిక్స్‌ చేసి, ఈ సినిమాని అద్బుతంగా తెరకెక్కించబోతున్నారట. ఈ మధ్య తెలుగు హీరోలు తమిళ సినీ మార్కెట్‌ని కూడా దృష్టిలో పెట్టుకుని సినిమాలు చేస్తున్నారు. ఆ బాటలోనే విష్ణు నడుస్తుండడం అభినందించదగ్గ విషయం. తెలుగు సినిమా మార్కెట్‌ పరిధిని పెంచడానికి యువతరం ఇలాంటి నిర్ణయాలు తీసుకోవడాన్ని ఆహ్వానించాల్సిందే. మంచు విష్ణు సరసన ఈ చిత్రంలో సురభి హీరోయిన్‌గా నటిస్తోంది. 'ఎక్స్‌ప్రెస్‌ రాజా', 'జెంటిల్‌మెన్‌' చిత్రాలతో లక్కీ బ్యూటీ అన్పించుకుంది సురభి. అలాగే ఈ చిత్రానికి ఎస్‌ఎస్‌ థమన్‌ సంగీతం అందించనున్నాడు. ఇంకో వైపున మంచు విష్ణు హీరోగా నటించిన 'లక్కున్నోడు' సినిమా విడుదలకు సిద్ధమైంది. ఫిబ్రవరి 3న ఈ చిత్రాన్ని విడుదల చేసేందుకు రంగం సిద్ధమయ్యింది. 'లక్కున్నోడు' సినిమాలో విష్ణు సరసన హన్సిక హీరోయిన్‌గా నటిస్తోంది. ఏదేమైనా తమిళ హీరోలు తెలుగు మార్కెట్‌ని దృష్టిలో పెట్టుకుని సినిమాలు చేస్తుండడంతో వారిలానే మన హీరోలూ తమిళ సినీ మార్కెట్‌పై పట్టు సాధించాలని ఆశిద్దాం.