'అ' సినిమా నుండి మరో కొత్త క్యారెక్టర్‌ పరిచయమైంది. ఇప్పటిదాకా ఈ సినిమా నుండి పరిచయమవుతున్న క్యారెక్టర్స్‌ అన్నీ దేనికవే ప్రత్యేకంగా ఉన్నాయి. విభిన్నంగా పరిచయం చేస్తున్నారు. ఓ క్యారెక్టర్‌కీ, ఇంకో క్యారెక్టర్‌కీ అస్సలు పొంతనే లేదు. ఒకదానికి మించి మరోటి అన్నట్లుగా దేనికవే ప్రత్యేకం అనే స్థాయిలో డిజైన్‌ చేశారు. ఈ స్టిల్స్‌తోనే సినిమాపై అంచనాలు పెంచేస్తున్నారు. ఇప్పటి వరకూ వచ్చిన క్యారెక్టర్‌ స్టిల్స్‌ పరంగా సినిమాపై అంచనాలు ఆకాశాన్నంటేస్తున్నాయి. వాల్‌ పోస్టర్‌ సినిమా బ్యానర్‌లో ఈ సినిమా రూపొందుతోంది.

నేచురల్‌ స్టార్‌ నాని సమర్పణలో, ప్రశాంత్‌ వర్మ దర్శకత్వంలో, ప్రశాంతి తిపిరనేని నిర్మిస్తున్నారు. ఈ సినిమా నుండి తాజాగా వచ్చిన స్టిల్‌ ఏంటంటే, నటుడు మురళీ శర్మ క్యారెక్టర్‌ స్టిల్‌. ఈ స్టిల్‌ బ్యాక్‌గ్రౌండ్‌లో ప్లేయింగ్‌ కార్డ్స్‌ ఎగురుతూ కనిపిస్తున్నాయి. 'ఐ యామ్‌ ది గ్రేటెస్ట్‌' అని డిజైన్‌ చేసుంది. 'అహంకారపూరితమైన రౌడీ' అనే అర్ధం వచ్చేటట్టుగా క్యాప్షన్‌ పెట్టి ఈ క్యారెక్టర్‌ని రిలీజ్‌ చేశారు. పాత్రకి తగ్గట్లుగానే హావభావాలు పలికిస్తున్నారు మురళీ శర్మ ఈ ఫోటోలో.

స్టిల్‌ని పరిచయం చేసిన విధానం బట్టి, క్రూరమైన విలన్‌ పాత్రలో మురళీ శర్మ నటిస్తున్నట్లు తెలుస్తోంది. నాని ఓ చేప క్యారెక్టర్‌లో కనిపించనున్నాడు. రెజీనా ఓ డిఫరెంట్‌ అండ్‌ షాకింగ్‌ క్యారెక్టర్‌ చేస్తోంది. ఇక నిత్యామీనన్‌, ఈషా రెబ్బ, అవసరాల శ్రీనివాస్‌ ఇలా తదితర నటీనటులు స్పెషల్‌ క్యారెక్టర్స్‌లో కనిపించనున్నారు. కొత్త రకం కాన్సెప్ట్‌తో చాలా చాలా ప్రత్యేకతలతో తెరకెక్కుతోన్న 'అ' సినిమా ఫిబ్రవరిలో ప్రేక్షకుల ముందుకు రానుంది.