ప్ర‌ముఖ గాయ‌కుడు కె.కె హ‌ఠాన్మ‌ర‌ణం... సంగీత ప్ర‌పంచాన్ని కుదిపేస్తోంది. భాష‌కు ఎల్ల‌లు లేవ‌ని నిరూపించిన సంగీత కెర‌టం కె.కె. దాదాపు ప్ర‌తీ భాష‌లోనూ సూప‌ర్ హిట్ పాట‌లు పాడి, శ్రోత‌ల‌కు ద‌గ్గ‌రైన గాయ‌కుడు కె.కె. తెలుగులోనూ ఆయ‌న ఎన్నో అణిముత్యాల్లాంటి పాట‌లు పాడారు. సుప్ర‌సిద్ధ సంగీత ద‌ర్శ‌కుల ద‌గ్గ‌ర ప‌ని చేశారు. కె.కె పాటంటే.. హిట్టే అనే న‌మ్మ‌కం ఉండేది. తెలుగులో త‌క్కువ పాట‌లే పాడినా.... ప్ర‌తీ పాటా గుర్తుంచుకోద‌గిన‌దే.
ఆటోగ్రాఫ్ స్వీట్ మొమొరీస్‌లో గుర్తుకొస్తున్నాయి.... అనే పాట ఎవ‌ర్ గ్రీన్‌. కె.కె గొంతులో మాధుర్యాన్ని అక్ష‌రాలా ఆవిష్క‌రించిన పాట ఇది. అప్ప‌టి నుంచీ మెలోడీలూ, పేథాస్ సాంగ్‌లూ.. కె.కెని వెదుక్కుంటూ వెళ్లాయి. నీ కోస‌మే... ఈ అన్వేష‌ణ, ఉప్పెనంత ఈ ప్రేమ‌కు, త‌ల‌చి త‌ల‌చి చూశా.., పాట‌లు కె.కె ని మ‌రింత పాపుల‌ర్ చేశాయి. వీటితో పాటు హుషారైన పాట‌లూ పాడి.. సంగీత ప్రియుల‌కు మ‌రింత ద‌గ్గ‌ర‌య్యారు కె.కె, `దాయి దాయి దామ్మా`, `ఏ మేరా జ‌హా`, `మై హార్ట్ ఈజ్ బీటింగ్‌...అదోలా`, చెలియా చెలియా.. ఇవ‌న్నీ హిట్ సాంగ్సే. ప‌వ‌న్ క‌ల్యాణ్‌, మహేష్, ఎన్టీఆర్‌, రామ్ చ‌ర‌ణ్‌, అల్లు అర్జున్‌... ఇలా అగ్ర క‌థానాయ‌కులంద‌రికీ పాట‌లు పాడారు కె.కె. ఇప్పుడు ఆయ‌న మ‌ర‌ణం..ఆయా హీరోల అభిమానుల్నీ క‌ల‌చి వేస్తోంది.
