నాగార్జున, నేచురల్‌ స్టార్‌ నాని కాంబినేషన్‌లో తెరకెక్కుతోన్న మల్టీ స్టారర్‌కి 'దేవదాస్‌' అని టైటిల్‌ ఫిక్స్‌ చేశారు. శ్రీరామ్‌ ఆదిత్య ఈ చిత్రాన్ని తెరకెక్కిస్తున్నాడు. వైజయంతీ మూవీస్‌ బ్యానర్‌లో ఈ చిత్రం రూపొందుతోంది. నాగార్జున ఈ సినిమాలో మాఫియా డాన్‌ పాత్ర పోషిస్తున్నాడనీ, ఆ డాన్‌కి వైద్యం చేసే డాక్టర్‌ పాత్రలో నాని కనిపించబోతున్నాడంటూ ప్రచారం జరుగుతోంది. తాజాగా విడుదలైన టైటిల్‌ లోగోని బట్టి నాగార్జున పేరు 'దేవ్‌' అనీ, నాని పేరు 'దాస్‌' అనీ తెలుస్తోంది.

వరుస విజయాలతో దూసుకెళ్తున్న నానికి 'కృష్ణార్జున యుద్ధం'తో బ్రేక్‌ పడింది. అలాగే 'ఆఫీసర్‌'తో నాగార్జున కూడా బోల్తా కొట్టాడు. సో 'దేవదాస్‌' ఈ ఇద్దరికీ ప్రతిష్ఠాత్మకమే. అందుకే ఈ మల్టీ స్టారర్‌ని శ్రీరామ్‌ ఆదిత్య ఓ వైవిధ్యభరితమైన చిత్రంగా తెరకెక్కిస్తున్నాడట. ఫుల్‌ లెంగ్త్‌ కామెడీతో పాటు విభిన్నమైన కాన్సెప్ట్‌నీ ఈ చిత్రం ద్వారా చూపించబోతున్నాడట. ఓ స్పెషల్‌ థ్రిల్‌నివ్వబోతోందట ఈ కొత్త 'దేవదాస్‌'.

ఇకపోతే టైటిల్‌ విషయానికి వస్తే, 'దేవదాస్‌' అనే పేరుకు ఎంతటి ప్రత్యేకత ఉందో అందరికీ తెలిసిందే. అక్కినేని నాగేశ్వరరావు పాపులర్‌ సినిమా టైటిలే ఇది. ఈ టైటిల్‌ని పెట్టారంటేనే సినిమా విషయంలో ఎంతో జాగ్రత్తలు తీసుకుని ఉండి ఉండాలి. అయితే ఇక్కడ గమనించాల్సిందేమంటే, అది 'దేవదాసు'. ఇది 'దేవదాస్‌'. ఈ చిన్న ఛేంజ్‌ ఎందుకో సినిమా చూస్తే కానీ తెలియదట. ఏం చేస్తాం. అంతవరకూ వెయిట్‌ చేయడం తప్ప.!