నిన్న మొన్నటిదాకా తేజు - వినాయక్‌ దర్శకత్వంలో తెరకెక్కుతోన్న సినిమాకి టైటిల్‌ 'ధర్మాభాయ్‌' అనుకున్నారు. అయితే తాజాగా ఈ టైటిల్‌ నాగ చైతన్య కొత్త సినిమా టైటిల్‌ అని ప్రచారం జరుగుతోంది. నాగ చైతన్య హీరోగా శ్రీనివాస్‌ రెడ్డి దర్శకత్వంలో ఓ సినిమా తెరకెక్కనుంది. ఈ సినిమాకే టైటిల్‌ 'ధర్మాభాయ్‌' అని అనుకుంటున్నారట. అయితే ఇంకా అధికారిక ప్రకటన రాలేదు. చూడాలి మరి ఈ టైటిల్‌ ఎవరి సొంతం కానుందో. 

కాగా ప్రస్తుతం చైతూ 'సవ్యసాచి'లో నటిస్తున్నాడు. చందూ మొండేటి ఈ చిత్రాన్ని తెరకెక్కిస్తున్నాడు. 'ప్రేమమ్‌' సినిమాతో ఈ కాంబినేషన్‌ మంచి విజయం అందుకుంది. సో ఈ కాంబినేషన్‌పై అంచనాలున్నాయి. నిధి అగర్వాల్‌ హీరోయిన్‌గా నటిస్తోంది. భూమిక ఈ సినిమాలో చైతూకి అక్కగా నటిస్తోంది. ఇటీవలే భూమిక 'ఎంసీఏ' చిత్రంతో ఓ మంచి హిట్‌ని తన ఖాతాలో వేసుకుంది. మరో వైపు సాయి ధరమ్‌ తేజ్‌ - వినాయక్‌ కాంబినేషన్‌లో తెరకెక్కుతోన్న సినిమా షూటింగ్‌ చివరి దశకు చేరుకుంది. ఫిబ్రవరిలో ఈ సినిమా ప్రేక్షకుల ముందుకు రానుంది. సి. కళ్యాణ్‌ ఈ చిత్రాన్ని నిర్మిస్తున్నారు. 

2017లో మెగాస్టార్‌తో 'ఖైదీ నెం.150' సినిమాతో బ్లాక్‌ బస్టర్‌ హిట్‌ కొట్టిన వినాయక్‌ 2018లో మెగా కాంపౌండ్‌ హీరో, మెగాస్టార్‌కి ముద్దుల మేనల్లుడైన సాయి ధరమ్‌ తేజ్‌తో మరో బ్లాక్‌ బస్టర్‌కి రెడీ అవుతున్నాడు. పక్కా మాస్‌ ఎంటర్‌టైనర్‌గా ఈ సినిమా తెరకెక్కుతోంది. వినాయక్‌ మార్కు యాక్షన్‌ ఘట్టాలు, ఎంటర్‌టైన్‌మెంట్‌.. ఇలా అన్ని కమర్షియల్‌ ఎలిమెంట్స్‌ ఈ సినిమాలో పుష్కలంగా ఉండబోతున్నాయట. అన్నట్లు చిరంజీవి సూపర్‌ హిట్‌ సినిమా 'కొండవీటి దొంగ' నుండి 'చమక్‌ చమక్‌ చమ్‌..' పాటను ఈ సినిమా కోసం రీమిక్స్‌ చేయనున్నారనీ సమాచారమ్‌.