నాగశౌర్య హీరోగా నటించిన 'ఛలో' సినిమా ఈ రోజు ప్రేక్షకుల ముందుకు రానుంది. కాగా నిన్న రాత్రి ప్రివ్యూ షోస్‌ నుండి అందిన సమాచారమ్‌ ప్రకారం సినిమా చాలా బాగుందని టాక్‌ వస్తోంది. హీరో, హీరోయిన్లు ఇద్దరూ బాగా నటించారనీ, స్టోరీ కొత్తగా ఉందనీ టాక్‌ వినిపిస్తోంది. ఈ సినిమాకి పబ్లిసిటీ కూడా బాగా చేశారు. దాంతో సినిమాపై క్యూరియాసిటీ పెరిగింది. 

ఇదిలా ఉండగా, ఈ రోజు'ఛలో' విడుదలవుతున్న ధియేటర్స్‌ వద్ద సందడి వాతావరణం నెలకొంది. ఈ కోలాహలం చూస్తుంటే, 'ఛలో' ఓపెనింగ్స్‌ నాగశౌర్య స్టామినాకి నిదర్శనం కాబోతున్నాయనీ ట్రేడ్‌ పండితులు అంచనా వేస్తున్నారు. అయితే ఇదంతా మార్నింగ్‌ షోకి ముందు టాక్‌. కాస్సేపట్లో అసలు రిజల్ట్‌ ఎలా ఉండబోతోందనే దానిపై పూర్తి క్లారిటీ రానుంది. ఏది ఏమైనా సినిమాని బాగా ప్రమోట్‌ చేశారు. టాక్‌ కూడా బాగా ఉంది కాబట్టి, ఒకవేళ ప్రేక్షకులకు సినిమా నచ్చితే, మంచి కమర్షియల్‌ సక్సెస్‌ని తన ఖాతాలో వేసుకున్నట్లే 'ఛలో'తో యంగ్‌ హీరో నాగశౌర్య. కన్నడలో 'కిరిక్‌ పార్టీ' సినిమాతో పాపులర్‌ అయిన ముద్దుగుమ్మ రష్మికా మండన్నా ఈ సినిమాతో తెలుగులో హీరోయిన్‌గా పరిచయం అవుతోంది. 

ప్రివ్యూ టాక్‌ని బట్టి, ఈ ముద్దుగుమ్మ తొలి సినిమాతోనే టాలీవుడ్‌ ప్రేక్షకుల్నీ మెస్మరైజ్‌ చేసేలానే ఉందనిపిస్తోంది. ఇక పక్కింటి అబ్బాయిలా కనిపించే నాగశౌర్య ఈ సినిమాతో సరికొత్త అవతారం ఎత్తాడు. లుక్‌లో, బాడీ లాంగ్వేజ్‌లో కొంచెం మాస్‌, కొంచెం క్లాస్‌ టచ్‌ ఇచ్చాడు. సినిమా ఆశించిన స్థాయిలో సక్సెస్‌ అందుకుంటే, నాగశౌర్య మాస్‌ అప్పీల్‌ని కూడా ఆడియన్స్‌ యాక్సెప్ట్‌ చేసినట్లే అవుతుంది. మరోపక్క సోషల్‌ మీడియాలో కూడా నాగశౌర్య ఫ్యాన్స్‌ సినిమాని బాగా ప్రమోట్‌ చేస్తున్నారు.