గత నాలుగైదు నెలలుగా అన్నీ షూటింగులు వాయిదా పడ్డాయి. కరోనా కేసులు పెరుగుతూ ఉండడంతో ఎక్కువ మంది స్టార్ హీరోలు షూటింగులకు దూరంగానే ఉన్నారు. అయితే ఇప్పుడిప్పుడే కొందరు యువ హీరోలు మాత్రం షూటింగుల్లో పాల్గొనేందుకు సిద్ధమవుతున్నారు.

యువ హీరో నాగ శౌర్య ఈమధ్యే ఓ కొత్త సినిమాను ప్రకటించిన విషయం తెలిసిందే. ఈ సినిమా షూటింగ్ ను సెప్టెంబర్ మొదటి వారం నుంచి ప్రారంభించేందుకు సన్నాహాలు జరుగుతున్నాయట. నూతన దర్శకుడు సంతోష్ జాగర్లమూడి దర్శకత్వంలో తెరకెక్కనున్న ఈ సినిమాలో నాగశౌర్య ఒక విలుకాడు(ఆర్చర్) పాత్రలో నటించబోతున్నారు. ఈ సినిమా కోసం ఫిట్నెస్ పై ఎంతో శ్రద్ధ పెట్టి ఎయిట్ ప్యాక్ కూడా సాధించారు. ఈ సినిమా ఫస్ట్ లుక్ పోస్టర్ లో తన సూపర్ ఫిట్ లుక్ తో అందరినీ ఆశ్చర్యపరిచారు.

ఈ సినిమా మొదటి షెడ్యూల్ రామోజీ ఫిలిం సిటీ లో ప్లాన్ చేసారని సమాచారం. అన్నీ గైడ్ లైన్స్ ఫాలో అవుతూ షూటింగ్ చేసేందుకు సన్నాహాలు జరుగుతున్నాయట. ఈ సినిమాను నారాయణ దాస్ కె నారంగ్, శరత్ మరార్ లు సంయుక్తంగా నిర్మించబోతున్నారు.