ఈ ఏడాది సంక్రాంతికి 'శతమానం భవతి' చిత్రంతో తిరుగులేని హిట్‌ని సొంతం చేసుకున్నాడు దిల్‌ రాజు. సతీష్‌ వేగేశ్న దర్శకత్వంలో తెరకెక్కిన ఈ చిత్రం శర్వానంద్‌ని హీరోగా మరో మెట్టు ఎక్కేలా చేసింది. అలాగే ఈ సినిమాలో నటించిన ప్రతీ ఆర్టిస్టుకీ మంచి పేరు తీసుకొచ్చింది. సకుటుంబ సపరివారంగా చూడదగ్గ చిత్రంగా ఎంటర్‌టైన్‌ చేసింది. అందుకే ఇప్పుడు దిల్‌ రాజు, సతీష్‌ వేగేశ్న కాంబినేషన్‌లో ఇలాంటి మరో చిత్రం తెరకెక్కబోతోంది. 'శ్రీనివాస కళ్యాణం' టైటిల్‌ని ఈ సినిమాకి ఫిక్స్‌ చేశారు. 'శ్రీ వెడ్స్‌ నివాస్‌' అనే ఉపశీర్షికతో తెరకెక్కుతోన్న ఈ చిత్రం టైటిల్‌ చూస్తుంటేనే తెలుస్తోంది. ఇదో మంచి ఫ్యామిలీ ఎంటర్‌టైనర్‌ కానుందని. అయితే ఈ సినిమాలో నటించే నటీనటుల ఎంపిక ప్రస్తుతం జరుగుతోంది. నటనా ప్రాధాన్యం ఉన్న పాత్రలు కాబట్టి, ఈ సినిమాలో ప్రధాన పాత్రధారుల ఎంపిక కోసం చిత్ర యూనిట్‌ కొంచెం గట్టిగానే కసరత్తులు చేస్తోంది. యంగ్‌ నటీనటులతో పాటు, స్టార్‌ నటీనటుల్ని కూడా ఈ చిత్రం కోసం ఎంచుకుందామనే ప్రయత్నాల్లో ఉన్నారట దిల్‌ రాజు అండ్‌ టీం. ఈ ఏడాది ద్వితీయార్థంలో చిత్రీకరణ మొదలుపెట్టి, ఈ సినిమాను వచ్చే ఏడాది సంక్రాంతి బరిలో ఉంచాలన్నదే దిల్‌ రాజు ఆలోచన. అంటే మళ్లీ వచ్చే ఏడాదికి కూడా దిల్‌ రాజు మరో సంక్రాంతి హిట్‌కి ఇప్పటి నుండే స్కెచ్‌ ప్రిపేర్‌ చేసేస్తున్నాడన్న మాట.