నందమూరి బాలకృష్ణ తాజా చిత్రం 'రూలర్‌' విడుదల సందర్భంగా బాబాయ్‌ బాలయ్యకి ఆల్‌ ది బెస్ట్‌ చెప్పాడు అబ్బాయ్‌ నందమూరి కళ్యాణ్‌రామ్‌ సోషల్‌ మీడియా వేదికగా. బాబాయ్‌ అంటే అబ్బాయ్‌కి ఎంత గౌరవమో అందరికీ తెల్సిందే కదా! ఇదిలా వుంటే, ఎప్పటినుంచో తన బ్యానర్‌లో బాలయ్య హీరోగా ఓ సినిమా చేయాలని కళ్యాణ్‌రామ్‌ అనుకుంటున్నాడు. ఎన్టీఆర్‌ ఆర్ట్స్‌ బ్యానర్‌లో కళ్యాణ్‌రామ్‌ పలు సినిమాల్ని నిర్మించాడు.

ఈ మధ్యనే తన సోదరుడు యంగ్‌ టైగర్‌ ఎన్టీఆర్‌తో 'జై లవ కుశ' సినిమాని కళ్యాణ్‌రామ్‌ నిర్మించిన విషయం విదితమే. 2020లో బాలయ్యతో కళ్యాణ్‌రామ్‌ ఓ సినిమా నిర్మించే అవకాశాలున్నాయట. ఇందు కోసం కథా చర్చలు జరుగుతున్నాయనీ, ఓ యంగ్‌ డైరెక్టర్‌ ఈ సినిమాకి దర్శకత్వం వహిస్తాడనీ తెలుస్తోంది. అయితే, ఈ సినిమాలో కళ్యాణ్‌రామ్‌ నటించబోడట. కేవలం నిర్మాతగానే వ్యవహరించాలని కళ్యాణ్‌రామ్‌ అనుకుంటున్నాడట.

మరోపక్క, కళ్యాణ్‌రామ్‌ తన తాజా చిత్రం 'ఎంత మంచివాడవురా' పనుల్లో బిజీగా వున్నాడు. సతీష్‌ వేగేశ్న దర్శకత్వంలో రూపొందుతున్న ఈ సినిమాలో మెహ్రీన్‌ కౌర్‌ పిర్జాదా హీరోయిన్‌గా నటిస్తోంది. జనవరి 15న సంక్రాంతి స్పెషల్‌గా ఈ 'ఎంత మంచివాడవురా' ప్రేక్షకుల ముందుకు రానుంది.