నేచురల్ స్టార్ నాని వరుస విజయాల తరువాత 'మిడిల్ క్లాస్ అబ్బాయి' 'దేవదాస్' చిత్రాల తో రొటీన్ కథలు చేస్తున్నాడు అనే ముద్ర పడింది. ఆలా అనుకున్న వాళ్లకి సరైన సమాధానం చెబుతూ 'జెర్సీ' 'గ్యాంగ్ లీడర్' వంటి చిత్రాలతో హిట్లు కొట్టి నాని ఈజ్ బ్యాక్ అనిపించుకున్నాడు. ఇలా జాగ్రత్తగా స్క్రిప్ట్ సెలెక్ట్ చేసుకునే నాని బిజీ షెడ్యూల్ వల్ల ఒక భారీ చిత్రం చేజార్చుకున్నాడని టాక్.
తాజాగా మలయాళ హీరో 'దుల్కర్ సల్మాన్' పుట్టిన రోజు సందర్భంగా తాను నటిస్తున్న త్రిభాషా చిత్రానికి సంబంధించిన పోస్టర్ ఒకటి విడుదల చేశారు. అందులో లెఫ్టనెంట్ రామ్ గా దుల్కర్ ను చూపించారు. వైజయంతి మూవీస్ బ్యానర్ లో హను రాఘవపూడి దర్శకత్వం వహిస్తున్న చిత్రం ఇది. ఇంతకు ముందే నాని తో హను 'కృష్ణగాడి వీర ప్రేమగాధ' అనే సినిమా తెరకెక్కించి మంచి మార్కులు కొట్టేసాడు. ఆ మధ్య మీడియా తో మాట్లాడుతూ తన తదుపరి చిత్రం కూడా నాని తోనే చేస్తున్నట్టు చెప్పాడు.. మిలిటరీ బ్యాక్ డ్రాప్ లో నడిచే లవ్ స్టోరీ అని హింట్ ఇచ్చాడు. కానీ తరువాత నాని పలు చిత్రాలతో బిజీ అవ్వడం వల్ల ఆ ప్రాజెక్ట్ ఆగిపోయింది. మళ్ళీ ఇన్నాళ్లకు ఆ ప్రాజెక్ట్ తుది మెరుగులు దిద్దుకుని దుల్కర్ తో మొదలవుతుంది.
ప్రస్తుతం నాని.. టాక్సీవాలా దర్శకుడు 'రాహుల్ సాంకృత్యాన్' దర్శకత్వం లో 'శ్యామ్ సింగ్ రాయ్' అనే చిత్రం కోసం పని చేస్తున్నాడు.
