ఓ టీ టీ చిన్న సినిమాల‌కు క‌ల్ప త‌రువుగా మారింది. థియేట‌ర్లు ఎలాగూ మూసి ఉన్నాయి. ఓ టీ టీల‌కు ఇప్పుడు కంటెంట్ అవ‌స‌రం ఏర్ప‌డింది. దాంతో చిన్న సినిమాలు ఓ టీ టీ ఫ్లాట్ ఫామ్ వైపు చూస్తున్నాయి. ఈ ద‌శ‌లో మ‌రో చిన్న సినిమా ఓటీటీ చేతిలోకి వెళ్లిపోయింది. అదే... `భానుమ‌తి రామ‌కృష్ణ‌`. అందాల రాక్ష‌సితో ఆక‌ట్టుకున్న న‌వీన్ చంద్ర క‌థానాయ‌కుడిగా న‌టించిన చిత్ర‌మిది. స‌లోని లూత్రా క‌థానాయిక. శ్రీ‌కాంత్ నాగోతి ద‌ర్శ‌క‌త్వం వ‌హించారు.

ఈమ‌ధ్యే ట్రైల‌ర్ కూడా విడుద‌లైంది. ఈ సినిమాలో కావ‌ల్సినంత ఎంట‌ర్‌టైన్‌మెంట్ ఉంద‌ని ట్రైల‌ర్ చూస్తే అర్థ‌మైపోతోంది. అది న‌చ్చే ఈ సినిమాని కొన‌డానికి అమేజాన్ సంస్థ ముందుకొచ్చింద‌ని సమాచారం. దాదాపు 2 కోట్ల‌కు ఈసినిమా బేరం కుదిరిపోయింద‌ని, బ‌డ్జెట్ మొత్తం అమేజాన్ ప్రైమ్ రైట్స్ రూపంలో నిర్మాత‌కు తిరిగి వ‌చ్చేసింద‌ని తెలుస్తోంది. త్వ‌ర‌లోనే అమేజాన్ ప్రైమ్‌లో స్ట్రీమింగ్ డేట్ కి సంబంధించిన అధికారిక ప్ర‌క‌ట‌న వ‌చ్చే అవ‌కాశం ఉంది.