హీరోగా తెరంగేట్రం చేసినా, సక్సెస్‌లు రాకపోతే మిన్నకుండట్లేదు ఈ జనరేషన్‌ హీరోలు. ఇంకో యాంగిల్‌ ట్రై చేస్తున్నారు. అక్కడ సక్సెస్‌ అయితే, అదీ ఇదీ కూడా సైమల్టేనియస్‌గా కంటిన్యూ చేస్తున్నారు. తాజాగా ఆ కోవలోనే పయనిస్తున్నాడు యంగ్‌ హీరో నవీన్‌ చంద్ర. 'అందాల రాక్షసి' సినిమాతో హీరోగా తెరంగేట్రం చేశాడు. హీరోయిజంలోనే డిఫరెంట్‌ వేరియేషన్‌ పరిచయం చేసిన మనోడు ఏమంత తక్కువోడేం కాదని తొలి సినిమాతోనే అర్ధమైపోయింది.

ఇటీవల వచ్చిన 'అరవింద సమేత' కోసం త్రివిక్రమ్‌ మనోడ్ని విలన్‌గా వాడేశాడు. అంతకు ముందు నానితో 'నేను లోకల్‌' సినిమాలోనూ కాస్త నెగిటివ్‌ షేడ్స్‌ ఉన్న పాత్రలో కనిపించాడు. కానీ 'అరవింద సమేత'తోనే విలన్‌గా మంచి మార్కులేయించుకున్నాడు. ఇక ఇదే ఛాన్స్‌ మరోసారి వరిస్తే.. పండగే కదా. అది కూడా అలాంటిలాంటి సినిమా కాదు, స్టార్‌ హీరో సినిమా. అయితే ఆ స్టార్‌ హీరో తెలుగులో కాదు, తమిళంలో.

తమిళంలో ధనుష్‌ హీరోగా నటిస్తున్న ఓ సినిమాకి నవీన్‌ చంద్ర విలన్‌గా ఎంపికయ్యాడట. ఈ విషయాన్ని తాజాగా చిత్ర యూనిట్‌ అధికారికంగా ప్రకటించింది. మార్చి 6న ప్రారంభమైన ఈ సినిమా రెగ్యులర్‌ షూటింగ్‌ త్వరలో స్టార్ట్‌ కానుందట. దురై సెంధిల్‌ కుమార్‌ ఈ సినిమాకి దర్శకుడు. ధనుష్‌ సినిమాలో విలన్‌ అంటే నవీన్‌ చంద్రకు ఆ కిక్కే వేరప్పా.!